Медведево районысо «Семеновский» племзавод ЗАО-што «Генетике ден вольык кӱтӱм саемдыме кӱшеш шӧрым ыштен налме пашан пайдалыкшым нӧлталмаш» теме ден научно-практический конференций эртен. Тудым Марий Элын ялозанлык да продовольствий министрже Ю.Сидыганов вӱден.
Мемнан республик ялозанлыкым вияҥдыме корным ойырен налын гын, лӱштышаш вольык урлыкым саемдыде ок лий. Санденак племзаводышто эртарыме конференцийыште озанлык вуйлатыше, зоотехник, осеменатор-влак, шӧрым ыштен налме паша дене кылдалтше моло специалист-шамыч у сводный селекционный йӧн, ушкалым тӱжаҥдыме, осеменатор-влакым ямдылыме опыт, шӧр озанлыкыште сексироватлыме нӧшмым кучылтмын пайдалыкше да шуко моло у йӧн дене палыме лийыныт. Нижний Новгородысо «Генетик шӧр компаний» ООО гыч ветеринар науко кандидат Д.Никулинын кок докладшат погынышо-влаклан оҥай лийын.
Марий Элын ялозанлыкыштыже лӱштымӧ вольык урлыкым саемдыме пашалан эреак кугу тӱткыш ойыралтын да ойыралтеш, ончыл озанлыклаште наукын темлымыжлан кумдан эҥертат. Лӱштышым кугемдымаште тидыже пайдалыкым палынак нӧлталеш. Сай урлык ушкалым ончен куштышо 22 озанлык шотлалтеш. Республикыште 33,3 тӱжем вуй ушкал гыч 60 наре процентше — шӧрым шуко пуышо урлык.
Тений шым тылзыште шӧрым ыштен налмаш вич процентлан ешаралтын, 60 тӱжем тонным вончен. Ик ушкаллан шотлымаште кокла лӱштыш 148 килограммлан кугемын, 3 тӱжем утла килограммыш шуын.
А.АНДРЕЕВ.
