«Марий Эл телерадио» ГАУК-ын ончычсо директоржо Светлана Талован должностной полномочийже дене утыждене пайдаланымыж шотышто кодшо кечылаште суд лийын. Йошкар-Оласе суд ончычсо вуйлатышылан штрафым тӱлыкташ пунчалым луктын.
Рашемын: 2018 ий 19 мартыште тудо 31 декабрь марте юристын полышыжлан эҥертышаш шотышто ойпидышым ыштен. А ты ийынак учреждений Марий Эллан 100 ий теммылан пӧлеклалтше фильмым сниматлаш республикысе Тӱвыра, савыктыш да калык паша шотышто министерстве дене ойпидышым ыштен. Министерстве тидлан оксам ойырен. Ты фильмым, кузе каласыме, «юридически сопровождать» 4 ноябрьыште Талова саде юрист денак ойпидышым ыштен. Тыге «МЭТР» компанийлан 332 тӱжем теҥгеаш эҥгек ышталтын.
Тидын дене кылдалтше уголовный делам шымлыме годым ончычсо директорын пачерыштыже обыскым эртареныт, шуко документым поген налыныт да шымленыт, бухгалтерский экспертизым эртареныт, 25 утла свидетельым йодыштыныт, палдара РФ Следствий комитетын Марий Элысе Следствий управленийжын пресс-службыжо. Кокла нелытан преступленийым икымше гана ыштымыжым, адакшым окса эҥгек кугытым пӧртылмыжым шотыш налын, Светлана Таловалан суд 30 тӱжем теҥге штрафым тӱлыкташ пунчалым луктын.
Ушештарена: «Марий Эл Телерадио» компанийын директоржо Светлана Таловам 2019 ий октярбрьыште паша гыч колтеныт.
Тылеч вара «МЭТР»-ын юристше Кирилл Панькоат паша гыч каен. Тудо кызыт интернетыште тӱрлӧ блогышто республикысе Тӱвыра, савыктыш да калык паша шотышто министерстве нерген удам воза. Шкенжын ойлымыж почеш, каласыме ик интернет сайтыште, тудо чыла тидым ӱчым ыштыме семын серкала.
Л.КАМАЛЕТДИНОВА
