УВЕР ЙОГЫН

Шояк але чын окса?

Ӱмаште нылымше кварталыште Марий Элыште 18 шояк оксам верештыныт.

Эн чӱчкыдын 5000 теҥгеаш шояк оксам ыштат. Тыгайжым ӱмаште шымытым муыныт. Тыгак кучылтмаш гыч 1000 теҥгеаш 4 банкнотым кораҥденыт. Южышт эсогыл 10 да 5 теҥгеаш кӱртньӧ оксамат весемден ямдылаш шотым муыныт! Икымшыжым визытым муыныт гын, весыжым – коктым.

– Шояк окса огыл улмым рашемдаш манын, кумыт деч шагал огыл аралтыш палым тергыман, – темлат Россий банкын Волго-Вятский ГУ-жын Марий Элысе Национальный банкшын отделенийжын экспертше-влак. – Чын оксам шояк деч ойырен мошташ «Банкноты Банка России» мобильный приложений полшен кертеш.

Российысе окса знак-влакын чын улмыштым палаш рознично ужалыме сеть-влакын кассе пашаеҥышт Россий Банкын темлыме дистанционный курсыштым эртен кертыт. Тидлан оксам тӱлыман огыл. 2020 ий мучашлан тудым пӱтынь эл мучко 2,6 тӱжем еҥ эртен.

 

Л.КАМАЛЕТДИНОВА

Опубликовать в Одноклассники

Добавить комментарий