ЛӰМГЕЧЕ

Шочмо ялын эргыжым огыт мондо

Кодшо шуматкечын Кужэҥер район Аганур ялыште да Руш Шой кыдалаш школышто ты кундемын эргыже, туныктышо, литератор, шанчызе, мер пашаеҥ, марий калыкын ончылъеҥже Иван Ефимович Романов-Одарын шочмыжлан 130 ий темме кечым кумдан палемдышт, шочмо ялешыже шарнымаш кӱм шогалтышт. 

Кужэҥер велын ик эн чолга еҥже, марий калыкнан волгыдо ончыкылыкшо, илышыже верч тургыжланыше, тудын лӱмжым кӱшкырак нӧлталаш тыршыше, Совет властьым пеҥгыдемдымаште тале улмыжым ончыктышо, но шуко моло ончылъеҥна семынак репрессийын тулсавышышкыже логалше да ӱмыржӧ лагерешак кӱрылтшӧ И.Романов нерген газетна кумдан каласкалыш. Шой вел калык шке кундемысе тале еҥжым монден огыл да 130 ияш лӱмгечыжым кумдан палемдаш эше кодшо ийынак ямдылалташ тӱҥалын ыле. Эн ончычак верысе чолга еҥ, ончыч фермерлан ыштыше, кызыт Москвашке пашаш коштшо, Руш Шой ял кундем погынымашын депутатше, Саламатнур ялыште илыше  Ю.Смородиновым палемдыман. Юрий Тимофеевичак Аганур ялеш Романов лӱмеш кӱм шогалташ, уста еҥым порын шарналташ кӱлмӧ шонымашым луктын. Чыла тидым ворандарен колтышашлан кучем органлашкат миен коштын, верысе калык денат мутланен, шкежат пашалан кыртмен пижын.

— Жапше годым кумдан палыме, пагалыме айдемынам эшеат чапландарена гын, шочмо Аганур ялжын, пӱтынь Шой кундемнан лӱмжӧ эшеат нӧлталалтеш, мӱндыркӧ шарла, — ойла Ю.Смородинов. – Кызытсе жапыште кеч тыгай шарнымашан кӱм пышташ да почашат изи огыл роскот кӱлеш. Тидлан оксам ял калык деч погымо, шийвундым тыгак КПРФ-ын региональный отделенийжын Кужэҥер пӧлкаже ойырен, мый шкежат надырым пыштенам. Тичмаш кугу кӱм Визым курык гыч кондымо. Аганур ялысе пӧръеҥ-влак кӱм почмо осыгечын лу шагат кас марте прожектор тул дене волгалтарен, сценым ыштеныт, ошмам шареныт, моло пашам шутеныт. Ялын старостыжо Александр Крыловынат пашам виктарен колташ полшымо надырже кугу. Кӱм шогалтыме  верыште ончычшо медпункт, вара верысе школын ик классше верланеныт ыле. Но  пытартыш жапыште тушто шӱкшудо гына кушкын. Ынде чылалан коймо вер ялын ик эн пагалыме да жаплыме верышкыже савырна.

 

Кумданрак — «Марий Эл» газетын
2017 ий 21 октябрьыште лекше номерыштыже лудын кертыда.

В.Смоленцев.

Опубликовать в Одноклассники

Добавить комментарий