Афганистан гыч Совет войскам лукмылан 30 ий темме вашеш Марий Эл Правительстве пӧртыштӧ мероприятий эртен. Тушко сӧй пасуэш вуйыштым пыштыше-влакын родо-тукымышт, ача-авашт чумыргеныт.
Афган сар. Лу ий шуйнышо, шуко ешлан ойгым кондышо событийым тыге маныт. Тудо Марий Элымат ӧрдыжеш коден огыл: 72 еҥ мӧҥгыш пӧртылын огыл, коктын увер деч посна йомыныт.
Ты кечын нунын лишыл еҥышт: тулык ватышт, ача-ава, ака-шӱжарышт, иза-шольышт воинский порысым шуктышыла вуйыштым пыштыше родо-тукымыштым пырля шарналтеныт.
Марий Эл вуйлатышын лӱмжӧ дене погынышо-шамычым правительстве председательын икымше алмаштышыже Сергей Сметанин саламлен.
– Кӱлеш мутым муаш неле, но герой-влакын лишыл еҥышт пелен лияш – чап. Российын историйыштыже тиде событий моткоч кӱлешан да палым кодышо, мондаш лийдыме пагыт ойго да патырлык дене кылдалтын. Ты корным эртыше, подвигым ыштыше-влакым тауштен шарнаш тӱҥалына, – ойлен С.Сметанин.
Тиде мероприятийыште шукыштын, эсогыл пӧръеҥ-влакынат шинчавӱдышт лектын. 30 ий эртен, но ача-аваштын каласкалымыштым колыштын умылет: рвезе-влак нунылан эрелан икшыве семын кодыныт.
Кажныже икшывыже, палымыж нерген шарналтен ойлен: изи улмышт годым могай лиймышт, шке кумылын Афганистаныш служитлаш кайымышт нерген каласкаленыт. Шоналташат неле: вет нине герой-шамыч кокла гыч шукыштлан 20 ият темын огыл улмаш.
С.Сметанин вашлиймашыш погынышо-влаклан пеледыш ден шарнымашан медальым кучыктен да Россий президент В.Путинын ойлымо мутшым ушештарен: Афган сар ача-авана, эргына, акана-влакын, пеҥгыде улмыштым ончыктен, элнан историешыже келге кышам коден.
Е.Эшкинина.
Д.Речкинын фотожо