Вӱргечын С.Г.Чавайн лӱмеш национальный библиотекыште Дина Рычкован «Земля моя родная» книгажын презентацийже лийын.
Мутмастарын тиде 25-ше книгаже, шке манмыжла «лӱмгече книга», тудо Шернур районын 100 ий теммыжлан пӧлеклалтын. Книгагудын краеведений пӧлкажын пашаеҥже Елена Петрова келге содержаниян программым ямдылен, автор кызыт марте лукмо изданийлаже дене палымым ыштен. У книгашке легенде, йомак, ойлымаш, сценарий-влак пуреныт, «Родина на всех одна» ужашыште очерк-влакым вераҥдыме, «Эрвел шӱдыр» очеркын героиньыже – Россий образованийын сулло пашаеҥже, Шернур районысо Кукнур школышто руш йылмым да литературым туныктышо И.Д.Овечкина шкежат книга пайремыште лийын. Уна-влак кокла гыч Кугыжаныш Погын вуйлатышын алмаштышыжын полышкалышыже, Россий писатель ушемын йыжыҥъеҥже Александр Петров, «Марий книга савыктыш» пӧртын директоржо Юрий Соловьев, книгагудын директоржо Ирина Щеглова, Российын сулло сӱретчыже Иван Ямбердов, Марий кугыжаныш университетын доцентше Валерий Максимов, М.Шкетан лӱмеш драмтеатрын артистше Алина Егошина да пырля тунемме, пашам ыштыме йолташыже-влак шокшо мутым ойленыт.
Моторын сӧрастарыме книгам Марий книга савыктыш луктын. Иллюстраций шинчам куандара: Алексей Григорьевын сӱретше, Екатерина Григорьеван фотографийже-влакым кучылтмо. Книга йоча да студент-влаклан лудаш пайдале.
Л.СЕМЕНОВА
