Россий МЧС-ын Марий Элысе Тӱҥ управленийжын специалистше-влакын увертарымышт почеш, республикыште шошо вӱдшор апрельын кокымшо пелыштыже тӱҥалшаш.
Март мучаште да апрель тӱҥалтыште игече чот ок левеште гын, кугу вӱдшор лийшаш огыл, тудо икшырымын эртышаш. Но южын температуржо чотак кӱзен кая гын, вӱд ташлыме лӱдыкшат лийын кертеш. Южо вере илем-влак вӱдыш каен сеҥат. Мутлан, Йошкар-Олаште тудын йӱдвел-эрвел ужашыштыже — Нолько, Ширяйково микрорайонлаште, Медведево районысо Куяр посёлкышто, Звенигово райнысо Красногорский посёлкышто, Курыкмарий районысо Кум Рутко ялыште, Волжск олаште да Кокшайск посёлкышто. МЧС пашаеҥ-влакын увертарымыштлан ӱшанаш гын, социально- значимый обьект-влак вӱдыш каен кертме шотышто лӱдыкшӧ уке. Чрезвычайный ситуаций лийшаш огыл. Кызыт МЧС специалист-влак вӱдшор пагытыште лӱдыкшӧ лийын кертмым кораҥден толаш ямдылалтыт. Материальный да финанс шапаш ышталтын.
Республикысе эҥерлаште вӱд ешаралтмым эскерен толшашлан «Гидрометеорологий да йырым-йырысе средан мониторингше шотышто Верхне-Волжский управлений» ФГБУ-н республикысе филиалжын специалистше-влак лӱмын гидрологический пост-шамычым ямдыленыт. Тыгак вӱдыш каен кертше пӧртлаште илыше-влакым жаплан вес вере илаш кусарышашлан шым пунктым ямдылыме.
Вӱдыш логал кертше пӧртлаште илыше-влак шкештат вӱдшор пагытлан ончылгоч ямдылалтшаш улыт, шижтарат утарыше-влак. Мутлан, оралте воктеч лумым, ийым, торым ончылгоч кораҥдыман, вӱд йоген каен кертше манын, канавым кӱнчыман. Подвал ден нӧрепла гыч чыла луктын ямдылыман. Мӧҥгыштӧ йӱаш йӧршӧ вӱд ситышын, тыгак аптечке лийшаш улыт. Чылалан ситыше нӧрен кертддыме вургемымат ямдылаш уто огыл.
Вӱд нӧлталт кертме лӱдыкшӧ улмым палаш манын СМИ, тыгак СМС увер-влакым эскерен шогыман. Сандене мобильный телефонышто заряд эре ситыше лийшаш. Тыгак жаплан эвакуироватлыме пунктыш куснаш ямде лийман. Пӧрт гыч лектын кайыме годым электричествым йӧрташ мондыман огыл. Озанлыкыште ашныме вольык шотыштат ончылгоч шоналтыман.
С.Носова
