Игечын теве гына чот йӱштӧ шогымыжлан, а вара кенета левештымыжлан кӧра тазалык начарем кертеш. Тыгай годым мом ышташ кӱлмӧ шотышто Марий Эл Республикын тазалыкым аралыме министрже Марина Панькова теве мом ышташ темла:
— Давлений дене йӧсланыше-влак тудым эскерышаш улыт. Мален темман, куштылгырак кочкышым кочкаш тыршыман. Доктор мом ышташ темлен, тудым шуктыман. Эмлалтым шке шонымо семын чарныман огыл. Тыгак давлений «тӧрштылмылан» кӧра неле пашам ыштыман огыл. Поснак илалше-влак тидым шотыш налшаш улыт. Поликлинике марте каен огыда керт гын, врачым мӧҥгышкӧ ӱжыкташ але умбакыже кузе эмлалтме шотышто телефон дене ой-каҥашым налаш лиеш.
Регионыштына вашке уэш йӱкшемда. Тидым адакат эн ончычак гипертоник-влак шижыт.
Министр весымат палемден: нимом ыштыде, нелын чучмын шке семынжак эртымыжым вучыман огыл! Эмым йӱыда, но саемме огеш шижалт гын, вучен шинчыман огыл. Давлений огеш воло гын, а тудын икымше палыже-влак вуй корштымаш, поснак шоягоремыште, оҥышто нелылык шижалтеш гын — «вашкеполышым» ӱжыктыман! Мыняр вашкерак полышым йодыда, осложнений тунар шагалрак лиеш, инсульт ден миокардын инфарктше лийме лӱдыкшат иземеш. Сандене шукыжо еҥ-влакын шкеныштым кузе эскерымышт да тидлан мом ыштымышт денат кылдалтеш.
Л.Камалетдинова.
