Марий Эл Республикысе Кокла медицине пашаеҥ-влакын ассоциацийышт 2017 ий шыжым Россий Президентын грантшым сеҥен налын да кызыт «НужнаЯ помощь» проектшым илышыш пуртен.
– Проектын цельже илалше еҥ-влаклан полшаш: кызытсе саманыште илаш, илышын качествыжым саемдаш, чолга кужу ӱмырым арален кодаш, – каласкала проектын вуйлатышыже, Сарын ветеранже-влакын республикысе клинический госпитальыштын тӱҥ медсестраже, Марий Эл Минздравын сестринский пашам виктарыме шотышто тӱҥ специалистше, регионысо Кокла медицине пашаеҥ-влакын ассоциацийыштын председательже Е.Кузьминых.
Грантын 850 тӱжем теҥгежлан кызытсе медицине оборудованийым , инвентарьым, мебельым, тренажёрым налме. Тыгайже госпитальыште веле огыл, республикыштыжат тымарте лийын огыл. Тренажёр ден тӱрлӧ келыштарымаш-влак илалше еҥ-шамычлан йомдарыме мастарлыкыштым, моштымашыштым шарналташ полшат.
Проектыште участвоватлаш стационарыште да амбулаторийыште эмлалтше 200 пациентым ойырен налме. 100 еҥ реабилитаций программым эрта, а моло шӱдыжӧ результатым акла.
Комплекс программыш ныл секцийым пуртымо. «Инфоурок» секцийыште пациент-шамычын физический да психологический статусыштым рашемдат, нуным тӱшка дене шеледат да кажныжлан лӱмын программым палемдат. Пациент да тудын родыжо-влак «Чын коч», «Зарядкым ыште да шукырак тарваныл», «Тунем да вияҥ», «Кажне кечылан куане» гай теме дене лекцийым колыштыт. «Ушан парня» секцийыште илалше еҥ-влак тыгыде моторикыштым вияҥдат. Тушто бизиборд (полдышан, шнурокан, кнопкан, выключателян, шпингалетан, молниян да тыгыде моло настан панель) дене модыт, ошма дене сӱретлат, пазл, мозаике, конструктор, пластилин, су-джок-терапий, эсогыл тыглай немычпурса да шӱраш дене пайдаланат. «Сенсор пӧлем» секцийыште пациент-шамыч релаксацийым моткоч йӧратат. А «Тонус» секцийыште сенсоран Play Station модыш приставке полшымо дене капкылыштым тарватылыт.
Ушан тренажёр-влак чогашылын кажне тӱшкажлан, йыжыҥлан, шӱм-вӱргорно, нерве, шӱлымӧ системе-влаклан пайдале улыт, шкем рыҥ кучаш полшат, вийым ешарат, писынрак кошташ туныктат.
Проект февраль гыч ноябрь марте пашам ышта. Кызытак коеш: тудо начар тазалыкан, но чолган да шуко илаш шонышо илалше-влаклан пайдале лиеш.
М.ИВАНОВА.
