Башкортостанысе Мишкан селасе 1-ше №-ан лицейлан драматург Флорид Буляковын лӱмжым пуэныт. Флорид Минемуллинович Кугу Шады ялыште шочын, Российысе литератур да искусствышто кугыжаныш ден Башкортостан Республикын Салават Юлаев лӱмеш кугыжаныш премий-влакын лауреатше, Башкортостанысе тӱвыран сулло пашаеҥже, Башкортостан Республикын калык писательже, Мишкан районын почетан гражданинже.
Драматург чылаже 20 утла пьесым, икымше башкир сериаллан, кум кинороманлан, 9 кинофильмлан сценарийым, икымше башкир оперлан либреттом возен. Тудын лӱмжӧ шочмо велыштыже гына огыл, Российыште да тӱня мучко палыме. Пьесылаж почеш тӱрлӧ элыште 150 утла театрыште спектакльым шынденыт. М.Шкетан лӱмеш национальный драмтеатрыште «Эрта ӱмырем, кодеш кумылем…», «Ныл кувалан — ик сӱан» пьесылаж почеш спектакль-влакым шындыме.
Палыме драматургын лӱмжым шочмо кундемыштыже тачат шарнат да тудын дене кугешнат. Верысе тӱвыра полатын пырдыжыштыже мемориал оҥаже кеча. А ӱмаште октябрьыште Башкортостанысе Правительственный комиссийын да Мишкан район администрацийын советшын темлымашышт почеш Мишкан селасе 1-ше №-ан лицейлан Ф.Буляковын лӱмжым пуаш пунчалыныт.
Школлан тудын лӱмжым пуымо пайрем моткоч ойыртемалтшын эртен. Лицейыште драматурглан пӧлеклалтше выставкым чумыреныт. А пайремын торжественный ужашыже муниципалитетын гимнже дене тӱналын. Тудлан мутым Ф.Буляков возен. Тунемше-влак писательын «Ах, Бибинур, Бибинур» пьесыж почеш шындыме спектакльым модын ончыктеныт, весела концерт программым ямдыленыт.
Мишкан муниципальный район администрацийым вуйлатыше Рустам Мусин мероприятийым эртарыше-влакым тауштен, лицейын директоржо Евгений Малмыгинлан школлан драматургын лӱмжым пуымо нерген сертификатым кучыктен да кажне ийын Ф.Буляков лӱмеш лудмашым эртараш темлен.
Ф.КАДИКОВА.
Снимкыште: Башкортостанысе Мишкан селасе 1-ше №-ан лицейлан Ф.Буляковын лӱмжым пуымо пайрем поро шӱлышеш эртен.
