Параньга районысо Пумарий селаште шуко пачашан ик пӧртыштӧ илыше-влак шке вий дене йоча площадкым ыштеныт.
Тыгай шонымашыже нунын шукертак шочын, но пашалан тений кеҥежым гына пижыныт. Чоҥымо материал дене спонсор-влак Е.Фадеев, И.Файзрахманов, чия дене «Жилкомсервис» ООО полшеныт. Йоча площадкым эше почын огытыл гынат, икшыве-влак тушко куанен коштыт, вет тушто тӱрлӧ семын модаш йӧнан.
С.Носова.
Кеҥеж мучашке лишемеш…
Игече шокшо шогымылан кӧра йӱштылмӧ пагыт умбакыже шуйна. Чаманен каласыман, тений Марий Элыште 23 еҥ вӱдыш пурен каен.
Илыш гыч кайыме тӱҥ амал семын, республикысе аварийно-утарыше службын специалистше-влак вӱдыш йӱшывуя, тыгак йӱштылаш келыштарыдыме верыш пурымым, йочам вӱд воктене шкетшым кодымым ончыктат.
С.Носова.
