УВЕР ЙОГЫН

Тӱрлӧ калыкын келшен илымыжым Сабантуй пеҥгыдемден 15 июльышто Йошкар-Олаште Сабантуй пайрем эртен.

Тӱрлӧ калыкын келшен илымыжым Сабантуй пеҥгыдемден

 15 июльышто Йошкар-Олаште Сабантуй пайрем эртен.

Тиде кечын «Дружба» стадионышто калык гӱжлен. Йошкар-Ола ден республикын районлаж гыч веле огыл, тыгак Татарстан гычат творческий коллектив ден артист, самодеятельный, куштышо ансамбль-влак погынышо калыкым сылне муро, куштымаш дене куандареныт. Тиде пайрем республикысе татар тӱвыра рӱдерлан 20 ий теммылан пӧлеклалтын.

А сцене йыр спортлан, тӱрлӧ конкурсым эртараш площадкым йӧнештареныт. Тыге кумылан кажне еҥ, мутлан, вачӱмбаке вӱдварам пыштен куржмаште, тачкым шӱкен, мешакым «чиен» куржмаште,  тоям шупшмаште, петырыме шинча дене кӧршӧкым шалатымаште, эсогыл катыкым темыман ате гыч умша дене оксам лукмаште моштымашыжым да писылыкшым терген кертын. Йоча-влаклан гын поснак шуко модыш, таҥасымаш, конкурс эртаралтын. Профессионал спортсмен ден любитель-влак армспортышто, масс-рестлингыште вийыштым ончыктеныт. А Сабантуй корэш кучедалмаш деч посна лийын кертеш мо? «Пеледыш пайремыштат» эртаралтеш гын, тиде пайремыштыже тудын деч посна, мутат уке, лийын ок керт! Тыге турнирыште «Сабантуйын батырже» лӱмым  Муса Галлямов сеҥен налын. Пӧлек шотеш йӱла почеш тудлан илыше тагам кучыктеныт.  

Погынышо-влакым пайрем дене саламлаш Александр Евстифеев миен. Тудо тӱрлӧ площадкым ончен савырнен да палемден: Марий Эл — шуко национальностян республике, тыште чыланат ваш келшен илат.  

Чынак, плуг пайрем шукертак национальный кышкар гыч лектын.  «Пеледыш пайрем» да «Руш куэ» семынак Сабантуйымат Марий Элыште  марий, руш, татар, республикыште илыше моло национальностян калык чылан пырля палемдат.

— Национальный республикыште национальный пайрем-влакым палемден моштат. Тидыже моткочак кӱлешан, вет тиде – тӱвыралан, таза илыш йӱлалан, кухньо искусствылан шӱмаҥдымаш! – ойлен А.Евстифеев.   

Л.Камалетдинова.

 

Опубликовать в Одноклассники

Добавить комментарий