Пытартыш жапыште эм средствын оборотшо аланыште шоякланымаш палдырна.
Чыла шояк шыдым да мошенникым наказатлаш кумылым луктеш, но тудын эмлыме препарат дене кылдалтмыж годым осал паша поснак лӱдыкшӧ преступлений семын аклалтеш.
Ондалалтше-влак Россий Минюстыш шояк сатум ужалыше-шамыч деч оксам пӧртылтен кертше адвокатым яра пуымо нерген йодмашым чӱчкыдынрак да чӱчкыдынрак возаш тӱҥалыныт.
Калыкын полышым йодмыж гыч теве мом рашемдыме: преступник-шамыч правам аралыме органын пашаеҥже улына, те эмым шояклен ужалыше дене кылдалтше уголовный дела шотышто азапыш логалшылан шотлалтыда маныт да Российын Минюстышкыжо кугыжаныш адвокатым яра ойырымо нерген йодмашым пуаш темлат.
А вара азапыш логалшылан «адвокат» шкежак йыҥгырта да тӱлымӧ системе гоч оксам колташ кӱлмӧ нерген ойла. Да тиде еҥ, адвокат азапыш логалшылан огыл, а титаклалтшылан кӱлмым шоналтыде, палемдыме суммым мошенниклан кусара.
Мошенник-влак шкеныштым Россий банкын пашаеҥже семынат палдарен кертыт. Нуно БАД-лан але вес сатулан заказым ыштыше, тидлан оксам тӱлышӧ да заказым налде кодшо але шояк сатум налше-шамычлан жулик-влакым кучымо, судитлыме, но тӱлымӧ оксан ужашыжым пӧртылташ лийме нерген ойлат.
Тыгай шотан оптышыш чӱчкыдынжӧ рекламылан да телефон дене йыҥгыртышылан ӱшаныше илалше еҥ-влак логалыт. Нуным сӧрымӧ компенсацийым пӧртылтымӧ условият огеш ӧрыктаре, мутлан, «налогым», «взносым», «страховой сборым» але «кугыжаныш пошлиным» тӱлаш кӱлмӧ. Тыге – эше ик стресс, да кугужак огыл пенсий гыч черетан суммо йомеш.
Российын следственный комитетше интернет сетьышке шкеныштым ведомствын пашаеҥже семын палдарыше да БАД-ым ужалышын моральный зиянжым пӧртылташ темлыше мошенниклан ӱшанаш огыл манме шотан йодмашым шукертак вераҥден.
Шагал огыл мошенник интернет-кевытыште пашам ышта, тӱрлӧ сатум, ты шотыштак «сайын полшышо» эмым рынке ак деч шулдын темла, тыгодым, тӱрлӧ «комментаторым» ушен, нине сатум але сатулымо точкым моктыкта. Нуно, сатум курьер почто дене намияш сӧрен, заказын сумыжым ончылгоч тӱлаш йодыт, а оксам налмекышт, кылым кӱрлыт, «чот пойымекышт», интернетыште кевытын сайтшымат йӧршын кораҥдат.
Иктешлымаш икте гына: рекламылан вигак ӱшаныман огыл, сертифицироватлыме эм ден аптекыште официально регистрироватлыме медицине арверым гына налман, шке семын огыл, а врачын палемдымыж почеш эмлалтман да «чыла чер деч полшышо» эмым ужалыше мошенникын оптышышкыжо логалме деч шекланыман.
М.ИВАНОВА
