17 май – СПИД деч колышо-влакым шарныме кече
Коронавирусын пандемийже пагытыште моло осал чер нергенат мондаш огеш лий. Таче тӱнямбалысе калык СПИД деч колышо-влакым шарныме лӱмеш да илыше-шамычлан тиде шучко чер дене пеш куштылгын черланен кертме лӱдыкшӧ нерген ушештарыме шот дене тӱрлӧ мероприятийым эртара.
ВИЧ-инфекций – иммунодефицитын вирусшым шочыктышо чер. Тудо иммунный системым локтылеш да жап эртыме семын айдемым моло чер ден инфекций ваштареш шоген кертдымым ышта. СПИД – ВИЧ-инфекцийын вияҥме пытартыш йыжыҥже.
ВИЧ-инфекций кум йӧн дене кусна:
· половой кыл;
· парентеральный (вирусан вӱр айдеме организмыш логалеш);
· вертикальный (мӱшкыран улмо, азам ыштыме але тудлан оҥым пукшымо годым вирус ава дечын йочалан кусна).
Вирус черле айдеме деч таза деке ынже кусно манын, половой кыл годым барьерный манме йӧн дене аралалтман.
Медицине манипуляцийым эртарыме годым ВИЧ-инфекций дене черланыме деч ик йӧн гына – инъекцийым ик гана пайдаланаш лийме инструмент дене гына ышташ. Донорство годым – донорын вӱржым кӱлын тергаш.
ВИЧ дене инфицироватлалтше ӱдырамаш мӱшкыран улмыж годым вирус деч препаратым йӱэш, азам кесарево пӱчмаш йӧн дене ышта да шочшыжлан оҥым огеш пукшо.
Медик-влак ВИЧ-инфекций деч вакциным эшеат шонен луктын, кычал муын огытыл, сандене СПИД авалтымылан кӧра илыш гыч кайыме деч аралалтме йӧн кызытеш икте гына – жапыштыже эртарыме профилактике.
М.ИВАНОВА
