Идалыкын туныктышыжо – 2017
Кажне ийын, апрель мучаште, Марий Элын туныктышыжо-влаклан республикысе профессионал конкурс эртаралтеш. Тений тудо икымше гана Йошкар-Ола деч ӧрдыжтӧ лийын. Кундемнан эн уста педагогшо-шамыч мастарлыкыштым Медведево поселкысо 2-шо №-ан школышто, Медведево гимназийыште, а воспитатель-шамыч «Шӧртньӧ кол» йочасадыште ончыктеныт. «Идалыкын туныктышыжо-2017» (14 еҥ), «Марий йылмым эн сайын туныктышо-2017» (11 туныктышо), «Марий Элын эн сай воспитательже-2017» (16 еҥ), «Шӱмем йоча-влаклан пӧлеклем» (5 еҥ) конкурс-влак ныл кече шуйненыт.
Икымше кечын туныктышо-влак тӱрлӧ таҥасымаште усталыкыштым ончыктеныт, педагогике брифингыште, методике семинарыште, мастер-класслаште лийыныт. Кокымшо, кумшо кечын почылтмо урок ден занятийым эртареныт.
Жюри сеҥыше-влакын лӱмыштым мучаш марте ойлен огыл. Эн ончыч финалист-влак дене палдареныт, кажне конкурсантлан пӧлекым дипломым, шергакан пӧлекым кучыктеныт.
«Марий йылмым эн сайын туныктышо-2017» конкурсышто Курыкмарий район Виловат кыдалаш школышто тӱҥалтыш класслаште туныктышо Елена Шалаева (снимкыште — шола тӱрыштӧ) сеҥен. «Марий Элын эн сай воспитательже-2017» номинацийыште Волжск оласе 28-ше №-ан йочасадын воспитательже Светлана Ведерникова ойыртемалтын. «Идалыкын туныктышыжо-2017» лӱмым Йошкар-Оласе 11-ше №-ан лицейыште математикым, алгебрым, геометрийым туныктышо Татьяна Пахмутова налын.
Тений икымше гана «Икшыве-влаклан шӱмем пӧлеклем» конкурс эртаралтын. Сеҥышыш Шернур поселкысо йоча творчестве пӧртын туныктышыжо Валентин Алгаев лектын. Валентин Петрович Шернур район Кукнур школышто пашам ышта, йоча-влакым шинчалан руаш гыч тӱрлӧ модышым ышташ, пу гыч пӱчкедаш, кагаз гыч тӱрлӧ корзиҥгам, арверым тодаш туныкта.
Сеҥыше-влакын лӱмыштым палемдыме годым уло зал рӱжге кычкырен. Кажныжат нунын дене пырля куанен, вет ныл кече жапыште туныктышо-шамыч йолташыш савырненыт, пырля тургыжланеныт, икте-весылан эҥертеныт, ваш-ваш лыпландареныт. Республикыште сеҥыше-влакым Россий кӱкшытан конкурс вуча.
— Сеҥышыш лектам манын вучен омыл, санденак мылам тиде тат поснак куанле ыле. Ынде Российысе конкурслан ямдылалтман. Пашалан кызытак пижман. Ӱшанем, шкемын да республикемын чапшым ом волто, чылажымат кӱлеш кӱкшытыштӧ ышташ тыршем. Умбакыжат икшывына-влакым шочмо йылмым йӧраташ кумылаҥдаш тӱҥалам, — мане сеҥышыш лекше Елена Витальевна Шалаева.
Л.ШАБДАРОВА.
Снимкылаште: Финалыш лекше марий йылмым туныктышо-влак. М.Скобелевын фотожо.
