Шернур район Овдасола ялыште тиде кундемын кок эргыжлан Марий Элын сулло артистше Василий Павлов ден М.Шкетан лӱмеш марий национальный драме театрын ончычсо артистше Геннадий Васильевлан шарнымаш оҥам почаш шонат.
Таче кечылан Лебедев карьер гыч оҥам вераҥдыме кӱйымат шогалтыме. Тудым кондаш Чылдемыр гыч амалкалче Юрий Мамаев полшен. А оҥам июль мучаш марте ямдылен шуктышаш улыт. Лачак тудым ышташ оксам але марте тичмашын поген шуктен огытыл. Тиде суапле пашаш кажне кумылан еҥ ушнен кертеш. Тидлан 89278811916 телефон номерыш Сбербанк онлайн гоч оксам Маргарита Николаевна Макарова лӱмеш пышташ лиеш.
– Василий Павлов ден Геннадий Васильевым ме кажне гана порын шарнена, нунылан пӧлеклалтше мероприятийым эртарена. Шарнымаш оҥам август тӱҥалтыште але август кыдалне почаш шонена. Кызыт воктенсе кумдыкым тӱзатена, – мане М.Макарова.
Л.ШАБДАРОВА.
