УВЕР ЙОГЫН

Марий Элыште у мер организаций ышталтын

Марий Элыште эше ик у мер организаций ышталтын. Тиде —  Российысе военно-исторический обществын региональный пӧлкаже. 

 Кодшо арня мучаште тидын шотышто МарНИИЯЛИ-ште учредительный погынымаш эртен. Тушто Марий Эл правительстве председательын алмаштышыже Михаил Васютин лийын.

 Тиде обществе 2012 ий 29 декабрьыште Россий Президент Владимир Путинын указше дене келшышын ышталтын. Тудын тӱҥ шонымашыже — Российын военно-исторический эртыме корныжым шымлымаште кугыжаныш ден обществын вийыштым ушаш, военно-исторический наукын сеҥымашыже-влакым популяризироватлаш, историй факт-влакым савыркалымылан чаракым ышташ да военный службын, самырык тукымым шочмо элым йӧратыме шӱлышеш ончен куштымо пашан престижшым нӧлталаш. Обществын попечительский советшым «Роскосмос» космический паша шотышто кугыжаныш корпорацийын гендиректоржо Дмитрий Рогозин, а обществыжым РФ тӱвыра министр Владимир Мединский вуйлатат.

Учредительный погынымашке тӱҥ шотышто историйым шымлыме дене кылдалтше науко пашаеҥ-влак погыненыт. Нуно региональный пӧлкан пашажым ворандарен колтымо нерген мутланеныт, тудын  советшым, контрольно-ревизионный органжым сайленыт, паша радамым палемденыт. Региональный пӧлкам вуйлаташ МарНИИЯЛИ директор Евгений Кузьминлан ӱшаненыт.  

 Каласен кодыман, Военно-исторический обществын Россий мучко чылаже 82 регионышто пӧлкаже ышталтын. Марий Элысыже 83-шо лиеш.

 С.Носова.

Опубликовать в Одноклассники

Добавить комментарий