78 ий ончыч 22 июнь элыштына илыше-влакын пӱрымашыштым курымешлан вашталтен – лач тиде кечын 1941 ийыште фашист-влак, сар тӱҥалме нерген увертарыде, Совет Ушем ӱмбаке керылтыныт.
Сарыште вуйыштым пыштыше-влакым шарныме лӱмеш тиде кечын угыч Юрий Левитанын йӱкшӧ йоҥген: уло эл мучко шарнымаш мероприятий-влак эртеныт.
Йошкар-Олаште, Марково шӱгарлаште, «Горсть памяти» акций эртен. Юрино, Звенигово, Медведево районласе да рӱдоласе иза-шольо шӱгарла гыч мланде дене пырля 10 кисетым Екатеринбургышто верланыше Рӱдӧ военный округын штабышкыже колтеныт. Вараже нуным Москваште, Поклонный курыкышто, тоят. Республикын правительстве председательжын алмаштышыже Степан Воронцовын палемдымыж почеш, тыгай сынан мероприятий-влак кундемыштына илыше уло калыклан моткочак кӱлешан улыт.
22 июньыштак Йошкар-Олаште Вонский Чап монумент дене Шарнымаш митинг эртен. Марий Эл вуйлатыше Александр Евстифеевын лӱмжӧ дене республикын правительстве председательжын икымше алмаштышыже Михаил Васютин ойлен. Республик вуйлатышын палемдымыж почеш, чыла тукым-влак Кугу Отечественный сар нерген чыным арален кодышаш да, сеҥыше-влакын лӱмыштым мондаш огыл манын, тудым йоча ден уныка-влаклан каласкалышаш улыт. Тиде – шнуй обязанностьышт.
Церемоний мучаште республикын правительствыжын еҥже-влак Сергей Сметанин, Михаил Васютин, Йошкар-Олан мэрже Евгений Маслов, мер организаций-влакын представительышт да олаште илыше-влак Вонский Чап монумент ден Курымаш тул деке пеледыш аршашым пыштеныт.
Шарнымаш да ойганымаш кече лӱмеш мероприятий-влак пӱтынь республик мучко 21 июньыштак тӱналыныт. Кугарнян Йошкар-Оласе Шнуй Шочынаван успенийже черкыште Кугу Отечественный сарыште вуйыштым пыштыше 27 миллион совет еҥым шарныме лӱмеш молитвам лудыныт. Тылеч вара «Ночные волки» клубын участникше-шамыч чӱктымӧ сорта дене рӱдолан уремлаж еда эртеныт да тудым Воинский Чап мемориал комплекс деке конденыт. Тушко республикын правительствыжын еҥже, олан мэрже, мер организаций-влакын представительышт да чыла кумылан-шамыч «Шарнымаш сорта» всероссийский акцийыш ушненыт. Рӱдӧ тӱвыра да каныме паркыш пурымаште нуно «Шарнымаш корным» ыштеныт да «Помним» мутым сорта дене «возеныт».
Л.КАМАЛЕТДИНОВА.
