— Тыйже мом алят вучет? Мий, цементым кондо! А тый молан тышке шумеш пуренат? Тидыже вет пӧрт ончылна лиешыс! – шокта чолга ӱдыр йӱк.
— Чечасак кондем, — йоҥгыш ик велым.
— Йӧра, кораҥам, — шергылте вес велым.
Тыште чоҥымо паша моткочак талын кая. Тольык тиде иктаж ялыште пу але кермыч гыч илемым огыл, а … лум гыч пӧртым Кужэҥер районысо Йывансола школ пеленысе дошкольный группышто икшыве-шамыч «нӧлтат» ыле. Ӱдыр изи веле, а кок рвезе-шамыч дене туге командоватла – кушкын шумекше чот чолга вуйлатыше лиеш дыр, товатат.
Ончыч тиде йочасад лийын. Лӱмжат улмаш — «Родничок». 50 наре икшыве коштын. А кызыт – ик группо веле. Тыгай вашталтыш кум ий наре ончыч лийын. Икшывыжат пытартыш жапыште шагалрак коштеш. Тений улыжат — 13 ӱдыр-рвезе. 3 гыч 7 ияш марте нине йоча-шамыч Купсола, Йывансола да эсогыл Шорсола воктенысе Шӱргыял гычат улыт.
Мийымына годым йоча-шамыч лачак уремыш модаш лектыныт ыле. Санденак тыгай оҥай сӱрет ден мутланымашым ужаш да колаш йӧнна лийын.
Йочасад урем велымак кумылым савырыше. Чылажымат чевер мотор тӱсыш чиялтыме. Тыгайже икшыве-шамычлан кузе огеш келше? Воспитатель Елена Александровна Андрееван ойлымыж почеш, тиде сомылым тысе пашаеҥ-шамыч, а нуно кумытын улыт, ӱмаште кеҥежым 1 июнь гыч 31 август марте канымышт годым шуктеныт.
Йочасадым тӱрлӧ семын пойдараш, сылныракым ышташ ача-ава-влакат полшат. Мутлан, ӱмаште нуно могай-гына кормушкым конден огытыл?! Шукыштын фантазийыштлан ӧраш гына кодеш. Вет иктышт тудым ончычсо семынак пу гыч, но ойыртемалтшын ыштеныт гын, весышт профнастилым кучылтыныт. Кумшышт эсогыл шашлыкым ужалыме пластик ате гыч келыштареныт!
А ик эн тӱҥжӧ — тыште икшыве-шамычым изишт годымак марий тӱвырана ден йӱлана деке шӱмаҥдаш тыршат. Тидлан лӱмынак, мутлан, садикын ик изи пӧлемжын ужашыжым тоштер семын келыштареныт. Ойлымо почеш, тушко йоча-шамыч кугу кумыл дене пурат да ожнысо марий тӱран тувырым, ончылшовычым, моло вургем ден ондак кучылталтше ӱзгар, арвер-влакым ончен савырнен лектыт.
Тыге гын, ончыкыжым нуно марий шӱлышанак лийыт манын ӱшаныме шуэш. Адакшым Йывансола вел моткочак поро кумылан, марий йӱла ден тӱвырам пагалыше да аклыше кундем семын чаплана. Кӧ огеш пале «Мурсескем» ансамбльым?! Тугеже але вара кушшо тукым чыла тидым монда? Тыгай огеш лий, шонена.
Любовь Камалетдинова.
М.Скобелевын фотожо.
