МЕР ИЛЫШ ДА ЙӰЛА

Чыла указ тўрыс шукталтеш

Марий Элыште тўҥ федерал инспектор П.Журавлев исполнительный властьын федеральный органжын верысе органже-влакын вуйлатышышт дене эртарыме координационный совещанийыште шуко йочан ешлан илыме верым чоҥаш мланде участкым пуымо йодышым тарватен. Тудо палемден: ты йодыш Россий президентын «майысе указлаштыже» ик тўҥ семын ончыкталтын, сандене Юл кундем федерал округын полномочный представительжын пашаштыже ик эн ончыч шуктышаш семын шотлалтеш. Марий Элыште 5974 тыгай еш мландым налаш кумылым ончыктен, нунын кокла гыч 70 процентше, але 4192 еш, участкан лийын. Мландым тўҥ шотышто Медведево район Апшакплак ден Рябинка ялла пелен налыныт. Вес кундемлаштат участкым налын кертме йодышым тарваташ палемдыме.

 Республик участкым ойырымо шотышто  федерал округысо моло регион дене таҥастарымаште ончылно кая, а теве чоҥалтше кундемлаште инфраструктурым ыштымаште чот почеш кодеш. Сандене совещанийыште ты экшыкым кораҥдаш ведомство-влакым ушышо пашаче группым ышташ, тушко строительстве, финанс, кугыжаныш пого министерствыла да муниципальный образований-влакын еҥыштым пурташ кутырен келшыме.

Совещанийыште тарватыме вес йодыш – Российын Национальный гвардийжын войскажын Марий Элысе федеральный службо отделже да республикысе МВД-н подразделенийже, исполнительный власть да верысе самоуправлений орган, мер объединений-влак дене пырля икойыш шуын пашам ыштымаш. МВД штаб начальник А.Коновалов палемден: МВД ден Росгвардийын еҥже-влак патрульно-постовой ден корно-патруль службым пырля шуктат, вневедомственный охранын преступникым кучышо группыж дене ыштат. ОМОН дене калык тўшкан погынымо верлам, осал паша ышталтшаш нерген уверым тергат.

Марий Элыште Росгвардий отделын начльникше А.Бурдо каласен: у структурым чумырымо икымше йыжыҥым эртыме, личный состав, технике ден вооружений отделлан тўрыс пуалтын. Тидын шотышто республик округышто визымше верыште, отделым 96 процентлан чумырымо.

 Погынымашым иктешлышыла, палемдыме: РФ президентын нине йодыш дене кылдалтше чыла указше тўрыс шукталтеш.

А.АНДРЕЕВ.

Опубликовать в Одноклассники

Добавить комментарий