У Торъял районысо ветеран-влак ушемым ыштымылан тений 30 ий темын. Тидын лӱмеш райрӱдыштӧ, верысе тӱвыра пӧртыштӧ, 28 февральыште мероприятий эртен.
Эн ончычак погынышо-влакым У Торъял район муниципал образований вуйлатыше Е.Небогатиков, У Торъял район администраций вуйлатышын тудын алмаштышыже Д.Волков, тыгак республикысе ветеран-влак ушем вуйлатыше Р.Кулалаева саламленыт.
Районысо ушемын шочмо историйжым шергалаш гын, тудым 1987 ий 13 февральыште чумыреныт. Икымше вуйлатышыже Николай Федорович Чемоданов лийын. Тунам ушемыш 30 еҥ пурен. Тушто наставничестве, йоча да самырык-влак дене пашам ыштыме, таза илыш йӱлам пропагандироватлыме шотышто, военно-патриотический да культурно-массовый секций-влакым ыштеныт. Моткоч кӱчык жапыште сельсоветлаште, организаций ден предприятийлаште 32 ушемым почыныт.
1994 ийыште ушемым Кугу Отечественный сарын, педагогический пашан ветеранже Павел Лебедевлан вуйлаташ ӱшаненыт. Лач тудын тыршымыж дене районысо краеведений тоштерым почыныт. Павел Петровичын вуйлатымыж жапыште самырык-влакым патриотизм шӱлышеш шуарен куштымо шотышто поснак кугу паша ышталтын. Ушем член-влак школлашке чӱчкыдын лекташ тӱҥалыныт, самырык-влакын слетышкышт, форумышкышт, моло мероприятийлашке ушненыт. Ветеран-влак хор пелен тунамак ветеран-влакын клубыштым чумыреныт. 2005 ийыште тиде хор республиканский смотрышто лауреат лӱм дене палемдалтын.
1997 ийыште ушем председательлан Петр Николаевич Фоминыхым сайленыт. Тудын вуйлатымыж дене ушемын еҥже-влак, верлашке лектын, пашан ветеранже, пенсионер-влак дене вашлиймашым эртараш, илалше еҥ-влаклан тӱрлӧ полышым пуышаш верч тыршаш тӱҥалыныт.
2008 ий гыч ушемым Юрий Алексеевич Хлыбов вуйлатен. Тунам ветеран-влаклан полышым пуымо шотышто паша эшеат кугу кӱкшытыштӧ ышталтын.
Тудын деч вара вуйлатышылан Раиса Ивановна Мокосеевам шогалтеныт.
А 2014 ий гыч У Торъял районысо ветеран-влак ушемым Людмила Михайловна Лебедева вуйлата. Кызыт ушемыште 32 еҥ шотлалтеш. Тачысе кечылан район мучко ушемын 34 первичный организацийже пашам ышта. Нуно 5650 еҥым ушат. Тиде да пытартыш кок ий наре жапыште шуктымо паша нерген Людмила Михайловна погынышо-влакым палдарен.
Йошкар-Олаште У Торъял землячествым вуйлатыше Виктор Андреевич Наумовын тыршен пашам ыштымыжымат палемден коденыт, да Василий Васильевич Блинов лӱм дене тудлан Чап Грамотым кучыктеныт. В.Наумов шкежат землячестве вуйлатыше семын чолга вич еҥлан Чап грамотым кучыктен. Тыгак «Весела кова-влак» ансамбльлан шке книгажым пӧлеклен.
Погынышо-влакым йочасад гыч ӱдыр-эрге-влак почеламутышт дене, У Торъял тӱвыра пӧрт пеленсе «Селяночка» ден Кузнеч гыч «Весела кова-влак» ансамбль-влак куандареныт.
Л.Камалетдинова.
В.Наумовын фотожо.
Z/В номер/Наумов В.А.
