Кажне ийын теле полиатлон дене вуз ден сузышто тунемше студент-влак коклаште Российын чемпионатше ден первенствыже (троеборье: лўйылтмаш, силовой гимнастике, ече дене таҥасымаш) эртат. Марий Эл гычат тушко кумылын ушнат да моткоч сай результатым ончыктат.
Поснак МарГТУ ден РМТ-ын командыштым палемдыман.
Тений таҥасымаш Ковров олаште (Владимир область) лийын. Тушто вузла гыч 23, суз гыч 8 команде вийым тергеныт.
Суз-влак коклаште Марий Эл гыч радиомеханический техникумын командыже (977 очко) чемпион лийын. Вуз коклаште ПГТУ-н сборныйжо визымше верым (1257 очко) налын.
Личный зачётышто (суз коклаште) Марий радиомеханический техникумын студентше Станислав Егоров, 274 очком поген, сеҥышыш лектын, полиатлон дене спорт мастер нормативым шуктен. Николай Васильев, 241 очком поген, кудымшо верым налын, спорт мастерыш кандидат нормативым шуктен. Тыгак Илья Лысенком (8-ше вер), Александр Ивановым (9-ше вер), Михаил Лоскутовым (12-шо вер) палемдыман.
– Чылажат тыршымаш дене кылдалтын, – ойла тренерышт А.Захаров. – Куандара: рвезе-влак лийже манынак тыршат.
Е.Эшкинина.
Снимкыште: пьедесталыште – сеҥыше РМТ команде.
