СПОРТ

Чоҥен шуктат

Эртыше кечылаште молодёжный политике, спорт да туризм министр Лидия Батюкова Волжский районысо Приволжский посёлкышто физкультурно-тазаҥдыме комплексым чоҥен шуктымо нерген каласкалыш.

Республик вуйлатыше А.Евстифеевын кӱштымыж почеш, ты ФОК омсажым  Марий Эллан 100 ий темме кечын почшаш. Тудыжым тений 4 ноябрьыште палемдат.

Л.Батюкован ойлымыж почеш, проектно-сметный документаций ден палемдыме кугыжаныш экспертизе ямде. Лишыл жапыште подрядчикым ойырымо шотышто аукционым увертарышаш улыт.

– Ты йодышлан регионыштына моткоч кугу тӱткышым ойырат. Тудым Александр Евстифеев шкеак контрольышто куча, – мане вашлиймаш годым Л.Батюкова. – Конкурс почеш подрядчикым палемдена. Тудыжо вара Приволжский посёлкышто ФОК-ым чоҥен шукта. Проектно-сметный документацийым налме. Тудлан кугыжаныш экспертизын заключенийжат уло. «Газпромыш» официальный серышым, финансирований шотышто йодмашым колтенна.

Лидия Александровна спорткомплексым чоҥаш икымше окса полыш 2019 ийыште лийме нерген ушештарыш. Кокымшо ужашыжым лишыл жапыште вучат. ФОК-ым умбакыже майыште чоҥаш тӱҥалаш шонат.

Е.ЭШКИНИНА.     

 

 

Опубликовать в Одноклассники

Добавить комментарий