Марий Эл Правительствын Козьмодемьянск олан социально-экономически вияҥмыжлан пӧлеклалтше заседанийже деч вара регион вуйлатыше А.Евстифеев Юл эҥерын пурла велысе тӱҥ объектлажым ончен лектын.
Эн ончыч 825 веран нӧлтышашлык у школ участкыш каен. Олаште пытартыш школым 1986 ийыште чоҥеныт улмаш. Пашам вес ийын тӱҥалаш палемдыме. Тидлан федеральный субсидий ойыралтшаш, кугытшо 584 миллион теҥге гын, республикын бюджетше гыч 11 миллион кучылталтшаш улыт.
Александр Евстифеевын палемдымыж почеш, школым нӧлтымо шотышто паша республикыште сайын кая. Мутлан, Волжскышто у тунемме корпус нӧлталтеш, Йошкар-Олаште тургыжландарыше йодыш-влак кораҥдалтыт. Регион вуйлатыше школ-влакын материально-технический базыштым сайын пойдараш кӱлмым палемден. Школ кудывече, буфет, спортзал — чылажат тунемшым куандарышаш.
Козьмодемьянскыш миен коштмыж годым регион вуйлатыше «Экологий» нацпроектын «Оздоровление Волги» проектше дене кызыт уэмден олмыктымо эрыктыше сооружений-влакым ончен лектын. Олан мэржын ойлымыж почеш, паша 40 процентлан шукталтын. Август мучаште оборудованийын икымше партийжым, а октябрьыште кокымшыжым кондышаш улыт. Идалык мучаш марте пашам тӱрыс мучашлышаш улыт.
Тыгак А.Евстифеев оласе «Дарование» школ-интернатыште лийын. Тушто пищеблок шотышто нелылык уло, а шке оралтыже республик кӱкшытан тӱвыра поянлык объектлан шотлалтеш. Тудымат икмыняр этап дене олмыкташ палемдыме.
Моноола-влакын вияҥдыме фондын еҥже Андрей Баранов дене пырля Козьмодемьянскымат туризмым вияҥден колтымо йодышым ончен лектыныт. Эҥер серыште чоҥаш палемдыме причалыште лийыныт. Кажне ийын тушко 120 тӱжем наре турист толын кая. Тӱҥ шотышто — круиз теплоход дене, сезонлан 190 наре судно шогалеш. Сандене причал кӱлешак. Тудым «2020-2024 ийлалан Марий Элын социально-экономический вияҥмаш программыжын» посна проектше почеш ышташ палемдыме. Ик архитектур стильыште нӧлтымӧ причалыште йолын коштмо вончем, вучымо зал, теҥгыл-влак лийыт, тулым шупшыт. Ты проектлан 300 миллион теҥгем республикын бюджетше гыч кучылташ палемдыме. Пашам вес ийын мучашлышаш улыт.
Регион вуйлатыше А.Барановым олам вияҥдыме план дене палдарен да ты шотышто ваш келшен пашам ышташ кӱлмым палемден. Ола турист кластерыш саврынышаш, таклан огыл тудо «Малые города и исторические поселения» федеральный программын «Комфортная городская среда» программыштыже
сеҥышыш лектын. Юл серым да рӱдӧ площадьым тӱзатыме йодышат илышыш шыҥдаралтеш. Олан мэрже Михаил Козловын ойлымыж почеш, сентябрьыште экспертизым эртымеке, палемдымым илышыш пурташ шыҥдараш пижыт да вес ийын ты пашам мучашлат.
Регион вуйлатыше олан мэрже да моло ответственный-влаклан чыла объект шотышто пашам ворандарыме срокым эскераш кӱштен.
Марий Эл вуйлатышын Организаций да аналитике виктемжын уверже негызеш С.НОСОВА ямдылен.
