12 ноябрьыште Марий Эл правительствын заседанийыштыже республикын социально-экономически вияҥме корныжо да шушаш кум ийлан палемдыме бюджетше дене кылдалтше йодышлам лончыленыт.
А.Евстифеев Марий Элыште бюджетлан нагрузкым ыштыше парымым иземдаш да тыгодымак регионым кӱлешан корно дене вияҥдаш полшышо федеральный ден республикысе проект ден программе-влакын илышыш ӱшанлын пурен толмыштым палемден.
Промышленность, экономический вияҥмаш да торговльо министр Станислав Крылов 2021 ийыште да 2022-2023 ийлаште регионым социально-экономически вияҥдыме радам дене палдарен.
Министрын палемдымыж почеш, тений пандемий пагыт гынат, регионыштына 9 тылзе жапыште чоҥымо комплексын кугытшо 23,3 процентлан кушкын, ялозанлыкын – 5,3 процентлан, илаш пураш йӧршӧ илыме верын – 8,3 процентлан. Промышленный продукцийым ыштен лукмо кугыт ден розницыш ужалыме оборот иземыныт. Но 2020-2024 ийлаште кӱлешан проект ден прграмме-влакым илышыш пуртымо дене экономикын чыла отрасльжын вияҥмыжым ончыктышо регионысо валовый продуктым ий еда 2,4-3,2 процентлан кугемдаш ӱшан уло.
Марий Элын финанс министрже Алексей Торощин республикын 2021 ийлан да 2022-2023 ий-влаклан бюджетше нерген законын проектше дене палдарен. Доклад дене келшышын, тений консолидированный бюджетын налог да налоговый огыл доходшо 21,1 млрд. теҥге лийшаш, 2021 ийыште – 23,8 млрд. теҥге, 2022 да 2023 ийлаште – 25,6 да 27,8 млрд. теҥге. Парымым йыжыҥын-йыжыҥын иземдашлан шушаш ийлан бюджетшым профицит дене ыштыме. Марий Эл бюджетын тӱҥ роскотшо илышыш пурталтше национальный проект-влак дене кылдалын: 2021 ийыште тидлан 6,8 млрд. теҥгем кучылташ палемдыме, 2022 ийыште – 8,2 млрд. теҥгем, 2023 ийыште – 8,1 млрд. теҥгем. Тылеч посна, 2020-2024 ийлаште Марий Элым социально-экономически вияҥдыме индивидуальный программын мероприятийже-влак илышыш пурталтыт. 2021 ийыште тидлан 960 млн. теҥгем кучылташ пунчалме. Тичмаш налмаште, бюджетын 61,6 процент роскотшо социальный сферлан ойыралтеш, палемден министр.
Республикын тазалыкым аралыме министрже Марина Панькова РФ правительствын распоряженийжым шуктымо кышкарыште у коронавирус инфекций дене черланыше-влаклан эмым ситарыме нерген каласкален. Мутшо почеш, южо препарат элнан регионлаштыже йӧршын уке, сандене нуным Марий Элыш кондашлан производитель да дистрибьютор-влак дене паша шукталтеш. Чыла йодмашым Российын Минздравышкыже да Минпромторгышкыжо жапыштыже колтымо. Эм ситыдыме амал пытартыш жапыште калыкын тудым поснак шуко налмыже да маркировко системын пашаже лугыч лийме дене кылдалтын. Поснак кугу нелылык вирусым пытарыше препарат шотышто шижалтеш, сандене нине эмым налаш ешартыш окса кӱлеш.
Марий Элым вуйлатыше А.Евстифеев министрын йодмашыж дене келшен да медицине полышым амбулаторий условийыште налше коронавирусан пациент-влакым эмлаш республикын бюждетше гыч 1 млн. теҥгем ойырен. Тыгодым эмым жапым шуйкалыде налаш да пациент-влаклан ойыраш каласен.
Правительствын заседанийыштыже тыгак калыкын кеҥеж-шыже пагытлаште лӱдыкшыдымӧ илышыже да шушаш телылан задаче-влак дене кылдалтше йодышлам онченыт.
Правительстве председательын алмаштышыже Степан Воронцовын увертарымыж почеш, тений регионыштына чрезвычайный ситуацийым регистрироватлыме огыл. Тул азап лийын кертме да йӱштылмӧ пагыт жап шотышто кужемыныт гынат, чыла показатель сай: тул пижме случайын чотшо 30,9 процентлан иземын, пожарыште колышо-шамычын чотышт – 18,2 процентлан, сусыргышо-влакын чотышт – 28,1 процентлан. Марий Элым вуйлатыше А.Евстифеевын республикын бюджетше гыч ешарен ойырымо окса дене пожарный ден утарыше-влакын подразделенийлаштын материально-технический базыштым сайынак пеҥгыдемдыме.
Марий Элым вуйлатышын организаций да
аналитике виктемжын уверже негызеш
М.ИВАНОВА ямдылен
