ЙӰЛА МАРИЙ ЙӰЛА

Чоным кандараш — шӱвыр

«Кугечылан у тувыр» фестивальыште шӱвырзӧ Василий Кузнецов дене палыме лийна. Тиде акрет марий калык семӱзгар дене шоктышыжым парня денат шотлен лукташ лиеш. Ик тыгай мастарже лач тудо манын кертына. Василий У Торъял районысо Ташнур ялыште шочын-кушкын. Школ деч вара радиомеханический техникумым, Юл кундем технологический университетым тунем лектын. Кызыт Йошкар-Оласе ик туристический компанийыште программистлан ышта. Йӧратыме пашаж деч посна, «чоным кандараш» манеш шкеже, тудо шӱвыр дене шокташ тунемын. Тачысе кечылан сай шӱвырзо лийын шуктен манаш лиеш. Ынде тудым тӱрлӧ мероприятийыш, концертыш эсогыл  тӱрло коллектив-влак пырлят выступатлаш ӱжыт. Шочмо ялысе фольклор коллектив дене лектын коштымыж нерген ойлыманат огыл, тудо эре ямде.  «Кугечылан у тувыр» фестивальыштат туге шоктыш, сем почешыже кушталташ лекметак шуэш.

 Василий 38 ияш, шуко шочшан ача. Эсогыл ачажым ончен, икшывыже-шамычат ты семӱзгар дене веле огыл шокташ тӧчат. Вет пӧръеҥ эше шиялтыш денат шокта, тӱмырымат кыра.  Вич ий ончыч тудо шӱвырым кидыш налын. М.Шкетан лӱмеш национальный драме театрын артистше Сергей Данилов  деке тиде мастарлыклан лӱмын тунемаш коштын. «Эн нелыже, шокташ тӱҥалме годым, шӱлышым кучаш», — ойла тудо. Шокташ тунеммеке, тудо ты семӱзгар нерген материалым чумыраш тӱҥалын. А вара шкежак шӱвыроҥымат ышташ тунемын. Кызыт тудым молыланат ыштен пуэн кертеш. Василий сценыш лекме годым шӱвыр дене экспериментироватлаш йӧрата. Тӱрло музыкальный композицийышкат тудым пуртен да йоҥгалтарен кертеш.

  С.Носова.

Снимкыште: В.Кузнецов.

М.Скобелевын фотожо.  

Опубликовать в Одноклассники

Добавить комментарий