Март тӱҥалтыште Йошкар-Оласе 2-шо №-ан школышто йӱлаш пурышо торжественный митинг лийын. Тудо Ольга Тихомировам шарныме лӱмеш эртаралтын.
Митингым школ директор А.Чакичев почын. Тудо Кугу Отечественный сарыште лийше герой-влакым шарнаш кӱлмӧ нерген ойлен.
Мероприятийыште сареш вуйым пыштыше-влакым ик минут шып шоген шарналтеныт. Варажым «Беркут» общероссийский общественный организацийын Марий Элысе региональный пєлкан еҥже В.Евдокимов мутым налын.
Тылеч вара Ольга Тихомирован чапкӱжӧ воктеке пеледыш аршашым пыштеныт, тушто сортам чӱктеныт.
Ветеран-афганец ден «Воскресение» СПО-н боецше-влак «Патырлык урокым» эртареныт.
Ольга Тихомирова 1923 ийыште Лапшино ялеш (Йошкар-Ола) шочын. Кугу Отечественный сар деч ончыч Марий кугыжаныш педагогический институтыш тунемаш пурен. Кокымшо курс деч вара, 1942 ийыште, шке кумылын сарыш каен. Спецкурсым тунеммыж деч вара Ольгам Икымше Белорусский партизан бригадын разведподразделенийышкыже медсестралан колтеныт.
Разведчице чыла шотыштат шкенжым сай велым гына ончыктен. 1943 ий мартыште бригадым немыч-влак авыреныт. Неле татыште, группо вуйлатыше колымеке, О.Тихомирова командованийым ӱмбакше налеш. Вашӱўкнымаш деч вара разведчик-шамыч окружений гыч лектын кертыныт, но Ольга нелын сусырген да ӱмыр лугыч лийын. Тудым Витебск областьысе Козловичи ял воктене Братский шӱгареш тоеныт.
Колымыж деч 15 ий вара О.Тихомировам Отечественный войнан I степенян орденже дене палемденыт.
Йошкар-Олан ик уремжым Ольга Тихомирова лӱмеш пуымо.
Е.Эшкинина.
