Немыч свастикан вургемым калык ончыко чиен лекмылан айдемым мут кучаш шогалтат мо? Интернетыште тыгай палым вераҥдымылан могай наказаний лийын кертеш?
А.Мартьянов.
Волжск ола.
Йодышлан Медведево районысо прокурорын алмаштышыже, юстиций советник А.А.Пекшеев вашештен:
— РФ-н Административный правонарушений шотышто кодексшын 20.3 статьяжын икымше ужашыштыже ончыктымо почеш, федеральный закон-влак дене публично ончыкташ да пропагандироватлаш чарыме нацист атрибутикан але символикан, але нацист атрибутике да символикыла койшо атрибутике ден символикан, але экстремист организаций-влакын атрибутикышт ден символикыштан, тыгак моло атрибутике ден символикан вургемым публично ончыктымылан да пропагандироватлымылан гражданиным административно мут кучаш шогалтат. Мутлан, кодшо ийын Медведево прокурорын пунчалже почеш ик еҥым мут кучаш шогалтыме.
Кугыжаныш, политический, Гитеровский Германийын (1933-1945 ийласе) военный институтшын символжо семын Интернетыште нацист свастикым вераҥдымылан тыгак Административный правонарушений шотышто кодекс почеш административно мутым кучаш шогалтат. 1 тӱжем гыч 2 тӱжем теҥге марте штрафым да 15 сутка административный арестым палемден кертыт. Тидын годым административный правонарушенийым ыштыме арверымат конфисковатлат.
Пӧлеклан мо шотлалтеш?
Пациент тудым эмлыше врачлан сайын эмлымыжлан оксам пуэн гын, тиде взяткылан шотлалтеш мо? Мо дене взятке пӧлек деч ойыртемалтеш?
А.Николаева.
Йошкар-Ола.
Йодышлан Медведево районысо прокурорын полышкалышыже С.Г.Захарова вашештен:
— РФ-н Верховный судшын пленумжын (09.07.2013) 24-ше пунчалжын «Взяточничестве да моло коррупционный преступлений нерген дела-влак шотышто судебный практике нерген» 7-ше пунктыштыжо палемдалтын: сайын эмлымылан да черлылан тӱткышыкым ончыктымыжлан тауштымо семын врачлан оксам пуымаш взяткылан ок шотлалт.
Эмлыше врачлан таушташ кумылда уло, тидым ыштен кертыда. Но врачлан оксам должностной лица семын иктаж-могай функцийжым шуктымыжлан — больничныйым, справкым, инвалидность группым пуымыжлан але тыгай моло ошкылым ыштмыжлан — пуэда гын, тиде взяткылан шотлалтеш. Окса кугытат, тудым кузе кучыктымат шотыш ок налалт.
А взяткым пуымылан граждан-влаклан уголовно мутым кучаш логалеш. Тидлан эрык деч поснат коден кертыт.
С.Носова ямдылен.
