Коммерческий огыл сад товариществыште верланыше сад пӧртым илыме пӧртыш кузе савырыман?
Е.Николаев.
Йошкар-Ола.
Йодышлан Росреестрын Марий Элысе виктемыштыже тыге вашештышт:
– Сад пӧртым илыме пӧртыш але илыме пӧртым сад пӧртыш савыраш кӱлмӧ годым верысе кучем органыш але шуко функциян рӱдерыш (МФЦ) нине документым кондыман:
- сад пӧртым илыме пӧртыш але илыме пӧртым сад пӧртыш кусарыме нерген йодмашым;
- илыме але сад пӧртын документшым;
- оралтын технический состоянийже шотышто заключенийым;
- сад але илыме пӧртын икмыняр озаже улмо годым кажныжын нотариус дене пеҥгыдемдыме келшымашыжым.
Тыгай сынан йодмашым 45 кече марте ончат. Сад пӧртым илыме пӧртлан, илыме пӧртым сад пӧртлан шотлымо але тидым ышташ отказыме нерген пунчалым тудым лукмо деч вара кум кечыште колтышаш улыт.
М.ИВАНОВА
