Ийготыш шудымо пашам ыштен кертеш мо?
Н.Иванцов
Морко посёлко.
Йодышлан Медведево районысо прокурорын полышкалышыже О.Г.Лесовщикова вашештен:
— Ийготыш шудымо икшыве пашам ышташ шона гын, пашам пуышо тудын дене ончыч ойпидышым ыштышаш. Но тидын годым посна условийым шотыш налман. РФ Паша кодексын 63-шо статьяж дене келшышын, 16 ийым темыше дене гына ойпидышым ышташ лиеш. А тидын деч изирак ийготан икшыве дене ойпидышым тудын школым тунем лекмекыже гына ыштен кертыт.
Тыгак 15 да эсогыл 14 ияш денат ойпидышым ышташ лиеш, но тидын годым икмыняр условийым шотыш налман:
1) ачаже але аваже (попечитель) ден опеке да попечительстве орган тидын дене келшышаш;
2) паша тунеммашлан мешайышаш огыл;
3) паша куштылго лийшаш да тазалыклан эҥгекым ыштышаш огыл.
Ойпидыш икымше гана веле ышталтеш гын, организаций ийготыш шудымо икшывылан трудовой книжкам почшаш да кугыжаныш пенсионный страхований свидетельствым ыштышаш. Пашаш пурышо икшывылан организаций испытательный срокым палемден ок керт.
Пашаш пурымо деч ончыч икшыве медицине тергымашым эртышаш. Варажымат,18 ий шумешке, кажне ийын тергалтшаш. Тыгай тергымашлан организаций шкак оксам тӱлышаш.
С. Носова.
