Роспотребнадзорын Марий Элысе виктемжым вуйлатыше Светлана Булатова ден регионын тазалыкым аралыме министржым алмаштыше Татьяна Бастракован увертарымышт почеш, республикыштына COVID-19 дене кылдалтше сӱретын нелемын толмыжо палдырна. Пытартыш кок арняште кундемнан инфекционный стационарлашкыже коронавирусан пациент-влакым кок пачаш шуко эмлалташ пыштыме, пневмоний денат 1,5 пачаш шуко еҥ черланен. «Неле» черле-шамычын чотышт 28 гыч 49 процент марте кугемын.
С.Булатован палдарымыж гыч, биологический материалын образецше-влакым Референс рӱдерлаште секвенироватлыме годым коронавирусын индий геновариантшым (2 случай) да британ вариантшым (3 случай) мумо. Майыште регионышкына йот элла гыч 348 граждан толын, нунун кокла гыч 5 еҥже коронавирусан лийын. Инфекцийым Индий, Непал да Белоруссий гыч кондымо.
Марий Элым вуйлатыше Александр Евстифеев июньышто «Бессмертный полк» акцийым эртарыме годым калыкын у коронавирус инфекций дене мынярак черланен кертмыж нерген умылкален. С.Булатова тыгай мероприятийым эртараш лӱдыкшӧ манын вашештен.
Пытартыш арняште коронавирусан пациент-влаклан медицине полышым пуымо койко чотым 370 гыч 415 марте кугемдыме, палдарен Т.Бастракова.
Теҥгече Марий Элнан 7 медицине организацийыштыже 327 черле эмлалтын, ты чот гыч 96 пациент неле состоянийыште лийын, 212 еҥ кислород полшымо дене шӱлен, 19 черле – шодым искусственно вентилироватлыме йӧн дене.
Республикышкына Гам-КОВИД-Вак, ЭпиВакКорона да КовиВак вакцине-влакын 63610 комплектыштым кондымо, 10-15 кече гыч Гам-КОВИД-Вак вакцинын эше 22600 комплектше толшаш. Тымарте препаратын 88 процентшым кучылтмо.
Республикысе эпидситуацийым шотыш налын, Марий Элым вуйлатыше А.Евстифеев утларак ямде улмо режимым 5 июль марте шуен.
Марий Эл Республикым вуйлатышын организаций
да аналитике виктемжын уверже негызеш
М.ИВАНОВА ямдылен
