ТАЗАЛЫК

Пудырген, мом ышташ?

Ртутян градусник шаланен гын, мом ыштыман, вет тудо айдемылан лӱдыкшым ыштен кертеш вет?

Н.Загайнов.

Медведево поселко.

Йодышлан Россий МЧС-н Марий Элысе территориальный управленийыжын пресс-службыштыжо вашештеныт:

— Чынжымак, ртуть айдемылан лӱдыкшым ыштен кертше химический вещества, тудо аярта. Моло кӱртньо гай огыл, эсогыл пӧлемысе температур годымат южеш шулен йомеш. Айдеме тыгай юж дене кеч изиш шӱла гынат, тудын вигак вийже пыта, а кужу жап эрта гын, кочкаш ок кай, вуйжо коршта, нелаш неле лиеш, умшаште кӱртньӧ там лектеш, укшынчыкташ тӱҥалеш. Сандене тыгай пӧлемыште кужу жаплан кодман огыл.

Лач пудыргышо градусник але энергийым аныклыше лампычке пудыргымо дене ртутьын парже кеч-могай пӧлемыште шарлен кертеш. Сандене тыгай туткар лийын гын, теве мом ыштыман:

1. Ида лӱд.

2. Градусник шаланыме пӧлем гыч еҥ-влакым лукман.

3. Кидыш резине перчаткым, чурийыш медицине маскым (ночко марле повязкымат лиеш), йолыш бахилым чийыман.

4. Окнам, омсам почын шындымеке, ртутьым да шаланыше яндам вӱдым темыман янда атыш погыман да чоткыдо петыртыш дене петырен шындыман. Вӱд ртутьлан южышто шулен йомаш ок пу. Атым электроприбор деч торашкырак вераҥдыман.

5. Ртутьым скотч, лейкопластырь, кисточко дене, кагазыш чумырен, ночко газет дене нӧртен, резине грушо дене погаш лиеш. Погымо ртуть падырашым тыгак вӱдан янде атыш пыштыман. Тыгыде падырашыже ынже код манын, фонарикымат кучылташ уто огыл.

6. Ртуть паласыш, коверыш логалын гын, нуным сайын пӱтыралын, полиэтилен пакетыш герметично пыштыман да пачер гыч корандыман. Вара иктаж арня мучко кажне кечын нуным почкыман але йӧршеш луктын кудалтыман.

7. Ртуть велалтме верым 2 %-ан марганцовко раствор дене обработатлыман. Тидыже ртутьым окислитлыкта да южышто шулен кертме ойыртемжым пытара. Тыгай обработкым икмыняр гана кажне кум-вич кече

коден эртарыман. Тыгак шокшо шовын-содо раствор денат йыгаш лиеш: ик литр вӱдлан 30 грамм содым да 40 грамм тыгдемдыме шовыным пыштыман. Хлоран мушмо средствым кучылташ ок темлалт. Специализироватыме фирмылаште пӧлемым обработатлаш лӱмын демеркуризационный комплект-влакым ужалат.

8. Ртутьым поген налмеке, обработатлымеке, пӧлемыш 2-3 шагат наре яндар южым пуртыман.

9. Погымо ртутьым специализироватлыме организацийыш пуаш лиеш.

10. Ртутьым пылесос дене погаш, тудым унитазыш, раковиныш колташ чаралтеш.

С.НОСОВА ямдылен.

Опубликовать в Одноклассники

Добавить комментарий