УВЕР ЙОГЫН

«Черланаш правана уке»

Марий Элым вуйлатыше Александр Евстифеев эртыше заседанийла кокла гыч иктыштыже таче кечылан ик эн тӱҥлан да поснак кӱлешанлан шотлалтше калыкын тазалыкшым арален кодымо да пеҥгыдемдыме верч тыршыме йодышым угыч тарватен.

– 11 ноябрьыште Кремльыште эртыше правительстве член-влакын заседанийыштышт Россий президент Владимир Владимирович Путин теве мом рашемдыш: вакцинаций сезон уже мучашке лишемеш гынат, грипп дечын прививкым улыжат кум министр ыштен. Грипп дене черланымылан кӧра пашашке лекдымым президент шкем шке лӱйымӧ дене иктӧр аклен, – манын регионым вуйлатыше да тазалыкым аралыме министр М.Панькова деч прививкым ыштыктыдыме-влакын спискыштым кугарнян кастене кондаш йодын. – Ӱшанем, тудо кӱчык лиеш. Мыланем гын президентын кӱштымыжым шукташ ик кечат ситыш. Ме, правительствын еҥже-влак, черланаш праван улына манын ом шоно.

Прививкым ий еда ыштыкташ гын, организм тымарте палыме вирус дене пырля у штаммланат иммунитетым ышта. Ик тыгай штамм нерген Марий Элын Тазалыкым аралыме министерствыштыже шукерте огыл угыч шарналтеныт.

…2010 ий республикланна трагичный лийын. Тунам «H1N1» вирус семын палыме «сӧсна гриппым» икымше гана рашемденыт. Тудо ончычшо вольыкым веле авалтен, но вараже айдеме декат куснен да тӱнямбалсе калык коклаште кумдан шарлен. Марий Эл гриппын у штаммже дене кучедалаш ямде лийын огыл, сандене тудо ийын республикыштына палыдыме черын организмлан кугу нелылыкым ыштымыжлан кӧра 10 еҥ колен. Тылеч вара регионыштына тыгай случайым регистрироватлыме огыл.

Ушештарена, Марий Элыште калыкым грипп дечын вакцинироватлыме сезон умбакыже шуйна. Пытартыш данный-влак почеш, тымарте республикыште илыше 265 тӱжем еҥ грипп дене черланыме деч прививкым ыштыктен, тидыже калыкын чумыр чотшо гыч 38,9 процентыш шуэш.

Кызыт грипп дечын профилактикылан кучылтмо вакцине-влак таче кечылан эн чолгалан шотлалтше штамман, виян да лӱдыкшыдымӧ улыт, ӱшанле иммунитетым ыштат. Нуным республикышкына пыташ тӱҥалме семын кондат. Мутлан, кодшо арнян кугыеҥ-шамычлан 13519 дозо «Ультрикс» вакциным налме, а чылаже 195463 дозым кондымо – тидыже регионысо калыкын чумыр чотшо гыч 90 процентшым иммунизироватлаш сита. Лишыл жапыште вакциным пайлат да регионысо медицине тӧнежлашке колтат.

М.ИВАНОВА

Опубликовать в Одноклассники

Добавить комментарий