УВЕР ЙОГЫН

Чапле «машинан» лийын

Марий Эл правительстве председательын алмаштышыже Илга Дравниеце Йошкар-Оласе «Сосновая роща» интернат-пӧртыштӧ илыше Василий Царегородцевлан кушташ келшыше коляскым пӧлеклен. Тудым Марий Эл Республикым вуйлатыше Александр Евстифеевын кӱштымыж почеш налме.

 61 ийыш тошкалше Василий Васильевич – йоча годсек инвалид. «Сосновая роща» интернат-пӧртыштӧ 2011 ий гыч ила. 2018 ийыште, коляскыште шинченак, инклюзивный куштымаш ансамбльыште участвоватлаш тӱҥалын. Но тыглай коляске кушташ пешыжак келшен ок тол: нелырак да начарынрак кудалыштеш. Сандене Василий Царегородцев «Кумыл кож» («Ёлка желаний») акцийыште специальный коляскан лиймыже шумым ончыктен.

Алюминий оратан коляске куштылгырак, кӱчык эҥертышан, сандене тудын дене тарванылаш, кушташ палынак йӧнан.

Ушештарена, 27 декабрьыште Россий президент Владимир Путинын эртарыме Кугыжаныш Советын кышкарыштыже Марий Эл Республикым вуйлатыше Александр Евстифеев Кремльыште «Кумыл кож» у ий акцийыште участвоватлен. Мероприятийын тӱҥ задачыже – тазалыкыште экшык улман граждан, тулык йоча, шуко шочшан ешыште кушшо икшыве, неле илыш ситуацийыш логалше россиян, тыгак неле черан илалше еҥ-влакын кумылыштым шукташ. Акцийын условийже почеш, чыла кумыл 2019 ийыште шукталтшаш.

М.ИВАНОВА.

Опубликовать в Одноклассники

Добавить комментарий