УВЕР ЙОГЫН

Чаманымаш


«Марий Эл» газет эше ик йолташыже деч посна кодо. Тиде кечылаште Пошкырт кундем Балтач район Токтай ялын ӱдыржӧ, уста марий писатель, журналист, туныктышо, Россий писатель ушемын членже, Марий Эл Республикын калык писательже, Мария Каликаевна Илибаеван шӱмжӧ кырымым чарнен. Тений 20 октябрьыште тудлан 70 ий темеш ыле.
Школ деч вара профессионал шинчымашым Йошкар-Оласе 8-ше №-ан ГПТУ-што налын, чоҥымо организацийыште пашам ыштен. Варажым Н.К.Крупская лӱмеш кугыжаныш педагогике институтын историко-филологический факультетыштыже тунемын. Кӱшыл шинчымаш нерген дипломым налмеке, 1977-1979 ийлаште Кужэҥер районысо Шӱдымарий школышто марий йылме да сылнымутым, руш сылнымутым туныктен. 1979-1981 ийлаште «Марий коммуна» газет редакцийыште пашам ыштен, варажымат тудо «Марий Эл», тыгак «Кугарня» газетлаште тыршен.
Мария Илибаеван икымше сылнымут произведенийже 1972 ийыште «Марий коммуна» газетеш савыкталтын. 1985 ийыште «Ончыко» журналеш «Шем йыраҥ» ойлымашыже лудшо-влак коклаште кугу мутланымашым тарватен, критик-влак марий сылнымутыш талантан да шкешотан прозаикын толмыж нерген ойленыт.
1994 ийыште Марий книга савыктыш тудын «Кечан ӱмылыштӧ» романжым савыктен луктын. «Кумыл» сборникшымат, «Ончыко» журналыште савыкталтше повесть ден ойлымашыже-влакымат лудшо-влак шокшын вашлийыныт.
Мария Илибаеван усталыкыштыже посна верым кум книга дене савыктыме «Вес тӱняшке ямдылалтмаш» роман налеш. Произведений, 2003 ий гыч тӱҥалын, жапын-жапын «Ончыко» журналеш савыкталтын. 2019 ийыште произведенийже-влак «Антология современной литературы народов России. Проза» книгаште савыкталтыт. Мария Илибаева южо произведенийжым М.Акаш псевдоним дене воза.
2010 ийыште «Кугу тӱня – шыгыр тӱня» ныл книган романже савыкталтын, 2012 ийыште – «Порылык кушкаш полша» (ойлымаш-влак), 2014 ийыште – «Чоныштына кечыйол мераҥ» (йомак-повесть), 2016 ийыште – «Муро йӱсавыш», 2019 ийыште – «Тиде ушдымо тӱняште» (роман).
Мария Каликаевнан кажне произведенийже шкешотан, санденак тудын возымыжым йӧратен лудыт. «Марий Эл» газет редакций дене тудо эреак пеҥгыде кылым кучен, тудын ӱмыр лугыч лиймыжлан чаманымашым каласена.

Опубликовать в Одноклассники

Добавить комментарий