24-25 майыште Марий кугыжаныш университетыште финн-угор студент-влакын «Финн-угор калык-влакын поянлыкышт» тӱнямбал форумышт визымше гана эртен. Ты гана тушко элнан икмыняр регионжо гыч да вес эл гычат 350 наре студент ден аспирант чумыргеныт.
Мероприятий Республикысе курчак театрыште почылтын. Самырык шымлызе-шамычым Марий Элын тӱвыра, печать да калык-влакын пашашт шотышто министрже К.Иванов, образований да науко министр Н.Адамова, МарГУ-н ректоржо М.Швецов, Марий тӱвыра рӱдерын директоржо Н.Пушкина, Петрозаводск кугыжаныш университетын ректоржо А.Воронин, Югорск кугыжаныш университетын ректоржо Т.Карминская саламленыт. Кажныже форумын кӱлешан пашам ыштымыжым, калык поянлыкым, тӱвырам, йылмым, йӱлам вияҥдаш да аралаш полшымыжым палемден коден.
Икымше кечын ӱдыр-рвезе-влак Йошкар-Олам ончен коштыныт, пленар заседанийыште лийыныт. Эрлашыжым секцийлаште пашам ыштеныт. Тыгак кидыштым тӱрлӧ мастер-классыште лывыртеныт. Шукыштлан уа дене пидаш келшен, марий тӱрым тӱрлымашат ятыр еҥын кумылжым савырен. Чыла тиде марий калыкын ойыртемжым мыняр-гынат почын пуаш полшен.
Форум 25 майыште Национальный галерейыште мучашлалтын. Тушто докладыштым ик эн сайын лудшо-влакым палемденыт, нунылан дипломым да изирак пӧлекым кучыктеныт. Финн-угор калык вургем коллекций торжественный ужашым поснак сӧрастарен. А Н.Огарёв лӱмеш Мордва кугыжаныш университетын студентше-шамыч оҥай да шкешотан шоум ончыктеныт. Нунын сценкышт калык легенде дене кылдалтын, санденак мотокоч ойыртемалтше лийын. Ӱшанена, форумым петырымашке мийыше кажне еҥлан тудо шуко жаплан шарнаш кодеш.
А кызыт мутым самырык шымлызе-влаклан пуэна.
Алёна Петрова ден Виктория Истомина, Кудымкар педколледж: «Тиде кок кече моткоч пайдалын эртен. Ме шуко уым пален налынна. Коктынат тӱҥалтыш класслаште туныктышылан тунемына, садлан шымлыме пашана лач тиде теме дене кылдалтын. Марий Элыште икымше гана улына, садлан тудын нерген кӱчык жапыште шукырак пален налаш тыршенна. Йошкар-Олам ончен коштмо, марий калыкын йӱла ойыртемже дене палыме лийынна. Вес ганат тендан деке толаш шонена, молан манаш гын поро кумылда чоннам савырен.
Татьяна Макарова, Петрозаводск кугыжаныш университет: «Докладем карел йылмын ик наречийже дене лудынам. Тудо кайык-влаклан пӧлеклалтын. Лудмем годым иканаште руш йылмыш кусаренам. Вес шанче пашамат ятыр колыштынам. Нуным шке шымлымаштем кучылташ тӱҥалам».
Форумым петырымеке, самырык шымлызе-влак М.Шкетан лӱмеш национальный драме театрыш вашкеныт. Вет тушто «Финн-Угрий студенчествын миссше-2018» конкурс эртен. А тиде мероприятий нерген газетнан лишыл номерыштыже лудын кертыда.
Л.ШАБДАРОВА.
М.Скобелевын фотожо.
