ОНФ-ын исполкомжым вуйлатыше вашталтын.
Але марте тиде пашам Михаил Развожаев шуктен. Но тудым Россий президент Владимир Путин Севастополь олан губернаторжылан шогалтен. Ынде Общероссийский калык фронтын исполкомжым вице-губернатор – Московский областьын губернаторжын администрацийжым вуйлатыше Михаил Кузнецовлан ӱшаненыт.
Тыгай пунчалым рӱдӧ штабын заседанийыштыже луктыныт.
Михаил Кузнецов 1979 ийыште Москваште шочын. 2002 ийыште Москвасе педагогический кугыжаныш университетым тунем пытарен. 2013 ий сентябрь гыч 2015 ий сентябрь марте Москва областьын правительстве председательжын алмаштышыже лийын. Тылеч вара кум ий ты сомылым шуктымо дене пырля эше Москва областьын губернаторжын администрацийжым вуйлатен. Ӱмаште сентябрь гыч тыгак Москва областьын вице-губернаторжылан шогалтеныт.
Л.КАМАЛЕТДИНОВА
