Марий Элысе Эл кӧргӧ паша министерствын пашаеҥже-влакын сводный отрядышт Йӱдвел Кавказ регионыш черетан кужу командировкыш каен.
Нунылан тыланыме мутым республикысе МВД министр полицийын генерал-майоржо Сергей Волчков ойлен. Тудо полицейский-шамычлан службым наҥгайымышт годым дисциплиным да законым, шке обязанностьыштым кугу кӱкшытыштӧ шукташ темлен. Да тыгак каласен:
— Мӧҥгыштыда тендам лишыл еҥда, коллегыда да йолташда-влак вучаш тӱҥалыт. Тидым шарныза да мӧҥгеш тичмаш состав денак пӧртылза.
Полицейский-влаклан тыланымашым тыгак Марий Элысе МВД-н Ветеран-влак советшын председательже Рамазан Пшидаток ойлен. А МВД пеленысе Общественный ушемын еҥже протоиерей Александр Бачурин тыланыме мутым каласен, тыгак шнуй вӱдым шыжыктен да кажныжлан юмоҥам кучыктен. Тылеч вара полицейский-шамыч лишыл еҥышт дене чеверласеныт да командировкыш каеныт.
Л.КАМАЛЕТДИНОВА
Фотом Марий Элысе МВД-н пресс-службыж гыч налме
