УВЕР ЙОГЫН

«Марий Эл» – эн кугу йолташна»

Районлашке лекме годым «Марий Эл» ден «Сурт-пече» газетна-влакым лудшо-шамыч дене вашлийын мутланаш моткоч куанле.

Кодшо арняште Морко районыш командировко дене лектынна, Октябрьский посёлкышто илыше лудшына Лидия Никитина дене вашлийынна. Лотерей дене тудо редакцийын пӧлекшым модын налын.

Лидия Михайловна пелашыж дене коктын «Марий Эл» газетым шукертсекак налыт.

Шочмо йылмына дене савыкталтше газетым тӱҥалтыш гыч мучаш марте ик шӱлыш дене манме гай лудын лектам. Тыге ме республикыште веле огыл, Россий кумдыкышто мо ышталтме нергенат пален налына. Журналист-влакын марла яндарын, лудшылан умылаш лийшын возен моштымыштлан кажне гана куанен шергалам. Чолга марий ӱдырамаш, артист-влак, тазалык нерген пален налаш оҥайын чучеш, тыгак  тӱрлӧ ойлымаш, почеламут-шамычымат лудаш йӧн лиймылан тауштем, – куанжым шылтыде каласыш поро кумылан ӱдырамаш. – Каныме семын газетым ом луд гын, канымем гай огешат чуч.

Л.Никитина лотерей модмашке кажне пелийыште ушна, но пӧлекым икымше гана модын налын да моткоч куанен.

Лидия Михайловна ятыр ий кевытчылан тыршен, а кызыт – сулен налме канышыште.

«Марий Эл» – эн кугу йолташна. Тек тудын ӱмыржӧ кужу лиеш да кажне марий суртышто тудым йӧратен вучаш тӱҥалыт, – чонжым почо мемнан лудшына.

А.Байкова

Авторын фотожо

Опубликовать в Одноклассники

Добавить комментарий