4 ноябрьыште, Марий Эллан 100 ий теммым палемдыме кечын, республик вуйлатыше Александр Евстифеев Йошкар-Олаште Свирин лӱмеш скверыште лийын. Тушто шукерте огыл уэмдыме пашам мучашленыт.
Сквер Суворов уремыште верланен. Кызыт ты кумдыкым палашат йӧсӧ. Ончыч тыште ны теҥгыл, ны урно лийын огытыл, тротуар чот тоштемын улмаш. А ынде, «Оласе йӧнан кумдыкым ыштымаш» проект дене келшышын, асфальт-бетон шартышым вашталтыме, брусчаткым оптымо, вӱд йоген каяш лотокым шындыме, светильниклашке светодиодан лампычке-влакым сакыме. Тыгак изи архитектур формо-влак манмым вераҥдыме.
Регион вуйлатыше тиде кумдыкын чотак вашталтмыжым палемден.
— Ончыч тыште ошкыл эрташат огеш лий ыле. А кызыт уло проспектым, йолешке-влаклан кошташышт верым уэмден ыштыме. Еҥ-влак шкешт ты проектым ойырен налыныт, а оласе кучем тидым шуктен. Тыгай пашам умбакыже шуйыман, — тыгаай задачым Александр Евстифеев да Йошкар-Олан мэрже Евгений Маслов ончылан шынден да олаште илыше-влакын эше могай кумдыкым тӱзаташ кӱлмӧ нерген шонымашыштым рашемдаш кӱштен.
— Ме мом ыштен кертына – тидым кок-кум ийлан ончыко умылышаш улына. Рӱдола шотышто мемнан проект-влакын библиотекышт лийшаш. Тунам ик ырымат йомдарыде, ончыко каен кертына, — ешарен Александр Евстифеев.
Регион вуйлатыше палемден: тӱшкан пайдаланыме верлам тӱзатыме дене пырля зданий-влакын тӱжвал сыныштланат тӱткышым ойырыман.
«Оласе йӧнан кумдыкым ыштымаш» проект дене келшышын, тений Марий Элыште тӱшкан пайдаланыме 11 кумдыкым тӱзатышаш улыт. Тиде пашан тӱрыс акше 90 млн. наре теҥгешке шуэш. Тышеч кугурак ужаш оксаже йолешке-влаклан коштмо верлаште шартышым уэмдаш кучылталтеш.
Марий Эл Республикым вуйлатышын организаций да
аналитике виктемжын уверже-влак негызеш
Л.КАМАЛЕТДИНОВА ямдылен
