Тӱвыра, печать да калык-влакын пашашт шотышто министерстве 25 октябрь гыч 3 ноябрь марте Финн-угор калык-влакын кечышт жапыште «Кугезына-влакын кышашт дене» этнокультур проект фестивальым эртара.
Тудо Марий Эл Республикын 100 ияш лӱмгечыжлан пӧлеклалтеш. Мемнан тӱвыра илышыштына фестиваль кугу событийлан шотлалтеш. Тудо Российысе тӱрлӧ регионысо да Эстон Республикысе уна-влакым иквереш чумыра.
Фестивальыш Коми, Удмуртий, Карелий, Мордовий республикыла гыч усталык коллектив-влак, тыгак Башкортостан, Татарстан республикыла, Свердловск, Киров, Нижегородский областьла гыч специалист-шамыч толшаш улыт.
Лу кече жапыште тӱрлӧ вашлиймаш, мастер-класс-влак, экскурсий, тыгак фототворчестве да финн-угор калык-влакын куштымашышт фестиваль-влак да молат эртат.
А.Байкова.
