Марий кугыжаныш университет пеленысе кумшо ийготын университетше 2019-2020 ийлаште «Краеведений» курсын программыже кышкарыште Кугу Отечественный сарыште сеҥымылан 75 ий да Марий Элым ыштымылан 100 ий теммылан пӧлеклалтше 40 занятийым эртарен. Колыштшо-шамыч Йошкар-Олан музейыштыже, тӱрлӧ ончерыште, библиотекыште лийыныт, книгам лудыныт, акцийлашке ушненыт, почётан да кумдан палыме еҥ-влак дене вашлийыныт.
Шукерте огыл В.Колумб лӱмеш йоча-юношеский библиотекыште кум тукым вашлийын. Тушко Кугу Отечественный сарын участникше-влак 95 ияш Аркадий Трофимович Трофимов ден 97 ияш Алевтина Федоровна Черепанова, фашист концлагерьын тунам ийготыш шудымо узникше, 80 ияш юбиляр Алла Алексеевна Прыгунова, сарын йочаже Валентина Алексеевна Перфильева, Светлана Анатольевна Родникова, Эмилия Константиновна Миненкова, Екатерина Сергеевна Рудзей, тылын труженикше, политический репрессийын жертвыже, Йошкар-Оласе радиомеханический техникумын да Торгово-технологический колледжын студентше-шамыч дене пырля «ший ийготын» волонтёржо-влакат миеныт.
Библиотекын пашаеҥже-влак, обслуживатлыме пӧлкам вуйлатыше Анастасия Луговникова ден краеведений да периодике пӧлкам вуйлатыше Оксана Джуманова «Сар ӱдырамаш чуриян огыл» презентацийым ямдыленыт. Вашлиймашке толшо-шамыч шагал палыме военный хроникым, Кугу Сеҥымаш верч кредалше-влакын фотографийыштым онченыт, сарын ветеранже да йочаже, тылын труженикше-влакын шучко жап нерген каласкалымыштым шӱлалташ тоштде колыштыныт. Кугу ийгот ден начар тазалыкым шотыш налде, сарын геройжо-влак боевой йолташ, тыныс, шарнымаш нерген почеламутым лудыныт, йӧратымаш нерген мурым муреныт. А студент-влак нуным концерт дене куандареныт.
Шарнымашан пӧлекым кучыктымыж годым «Единый Россий» партийын Марий регионысо пӧлкажым вуйлатышын алмаштышыже Александр Смирнов палемден: «Тачысе гай вашлиймаш нигунамсе деч шергакан. Да, мутат уке, самырык-шамычым патриот шӱлышеш куштымаште кугу верым налеш. Чыла тиде, шарнымашым арален, тукым-влакым ваш уша. Тиде илыш гыч кайышылан огыл, тиде илышылан кӱлеш».
Торжественный ужаш деч вара мероприятийыш толшо-влаклан библиотеке мучко экскурсийым эртареныт. Вара йыргешке ӱстел йыр шинчыныт, тутло чайым йӱыныт, Йошкар-Оласе торгово-технологический колледжыште тунемше-влакын кӱэштме когыльыштым тамленыт.
«Краеведений» курсым вуйлатыше Надежда Соколова В.Колумб лӱмеш йоча-юношеский библиотекын директоржо Екатерина Ерпылёвалан колыштшо-влакын шке фондышт кондымо марий писатель-шамычын книгаштым пӧлек шотеш кучыктен. «Тыгай еҥ-влак дене вашлиймашым эртарымыланда моткоч кугу тау. Тиде вашлиймаш учебник деч оҥайрак», – манын тудо.
М.ИВАНОВА
