11 августышто Медведево районысо Пурсанур (Кузнецово) села воктенысе пӱяште туткар лийын, но ик самырык еҥын лӱддымылыкшылан кӧра чылажат сайын мучашлалтын.
Пурсанур ял шотан илем администрацийын пашаеҥже-влакын увертарымышт почеш, ныл шагат кечывалым Владимир Груздев ныл ияш ӱдыржӧ дене пӱяш ийын коштшо лудо-влакым эскераш каен. Машина гыч лекмеке, вӱдышто кайык уло-укем ончалын. Но нунын олмеш сер деч иктаж 5-8 метр тораштырак ушым йомдараш тӱҥалше йочам ужын. Тудын вуйжо вӱдыш каен улмаш, а капше эше ӱмбалне лийын. Шуко шонкалыде, Владимир чийыманак вӱдыш тӧрштен. Уло ӱнаржым поген, тудо йочам серыш луктын. Икшыве ушым йомдарыше лийын, шӱлен огыл, вӱршержат вуршержат шижалтын огыл. Тунам, нелме вӱд умша гыч лекше манын, Владимир йочам шӧрын пыштен. Вара искусственный шулышым, шӱм массажым ышташ тӱҥалын. Кок минут наре тидым ыштымеке, йоча ылыжын да сайын шӱлалтен колтен, шинчажым почын.
Тидын годым тораштак огыл лийше верысе кок еҥ А.Иванов ден А.Исинеков «112»» телефон номер дене утарыше службыш йыҥгыртеныт.
Йочан ылыжмекыже, Владимир тудын ночко вургемжым кудашын да кукшо футболкыш пӱтыралын, машинашкыже вераҥден. Толын шушо «вашкеполыш» туткарыш логалшылан медицине полышым пуэн, а Владимир машинашкыже шинчын да кудалын.
Россий МЧС-ын Марий Элысе Тӱҥ управленийыштыже кызыт айдемым утарымыжлан Владимир Груздевым палемдыме нерген йодышым каҥашат, кеч тудо шкенжым геройлан ок шотло. «Тиде подвиг огыл, тыге кажне пӧръеҥ ышта ыле», — каласен тудо.
Россий МЧС-ын Марий Элысе Тӱҥ управленийжын уверже негызеш С.Носова ямдылен.
