19 май – (изарня). Кушшо тылзе – Висаште. Ты шӱдыр кокла лектышан. Пакчаш киярым, кабачокым, кавуным, пурсам, немычпурсам ӱдаш шотлан толеш. Тӱрлӧ сорт пеледышым, декоративный вондым, розам шындаш, кусарен шындаш келша. Кушкылыш чер ден шукш-копшаҥге деч аярым шыжыкташ ок темлалт. Эмлык шудым ямдылаш келшыше пагыт.
Калыкыште ты кече озымым ӱдышӧ Мавран, шӧрым пуышо Мавран кечыже семын палыме. 16 май деч вара олыкышто шудо вольыклан теммеш кочкаш ситыше лийын шуэш. Ушкал тылеч вара кӱтӱ гыч темше толаш да шӧрым шуко волташ тӱҥалеш.
Таче тӱрлӧ сорт ковышта росотам йыраҥыш луктын шындаш йӧнан кече. Тудым чер да шукш-копшаҥге деч аралаш манын, кушкылым пакчаш луктын шындыме деч вара ӱмбакыже шнуй вӱдым шыжыктеныт да юзо шомакым пелештеныт.
Ты кече дене кылдалтше моло калык пале-влак:
- Озымым ӱдышӧ Мавран кечыже вашеш шӱшпык кужун мура – чыла тӱрлӧ кушкыл-шамыч писын пеледалтыт.
- Ломбо 16 май марте пеледалтын шуктен гын, тугеже игече вашке йӱкшемда.
- Эрдене лупс кӱжгын возын, тений кияр лектыш сай лийшаш.
- Шӧрва (ясень) лышташ тӱрыс почылт шуктен огыл, а тумо ужарген шогалын, кукшо кеҥеж шогаш тӱҥалеш.
- Комбо ден лудо шулдырышт ден лупшат, игече вашке вашталтеш.
- 15 гыч 16 май йӱдым ужмо омо писын шукталтеш.
- Таче шочшо-влак тамлын кочкаш шолтен моштышо лийыт. Нунылан аралтыш семын турмалиным да хризолитым нумалаш келшен толыт.
Р, ЧЕПАКОВА
