УВЕР ЙОГЫН

Утларак ямде лияш кӱлеш 

17 мартыште Марий Элым вуйлатыше Александр Евстифеев у коронавирус инфекцийын шарлен кертмыж деч регионыштына утларак ямде улмо режимым ыштыме нерген пунчалым луктын.

Тиде документ дене келшышын, республикыштына спорт, ончаш темлыме, публичный да шуко еҥ погыныман моло мероприятийым 15 апрель марте эртараш чарыме. Регион кумдыкышто тыгак 50 деч шуко еҥым иквереш ушышо каныме мероприятийым, ты шотыштак тӱвыра, физический культур да спорт, ончер, веселаҥдыме да сотемдарыме пашам эртараш чарыме.

Тылеч посна тунемше-влаклан 21 март гыч 12 апрель йотке тӱҥ, профессиональный да ешартыш шинчымашым пуышо, спорт таҥасымашлан ямдылыше организацийлашке кошташ чарыме. Тыгодымак санитарный режимым шуктымо шотышто йодмашым кӱлын эскерыме годым ача-ава-шамычын але закон дене пеҥгыдемдыме моло еҥын кутырен келшымышт почеш 1-4 класслаште тунемше-влаклан дежурный группым ышташ лиеш.

Граждан-шамычланат икмыняр обязательствым шукташ ыштыме. Тыге, у коронавирус инфекцийым регистрироватлыман кундемла гыч Россий Федерацийыш пӧртылшє еҥ-влак лачшымак кушто да кунам лиймыштым, вашкылым кучымо йӧным (телефоным, адресым) Марий Элын «шокшо линийышкыже» (8(8362)45-18-08)йыҥгыртен каласышаш улыт. Респираторный манме икымше палым шижмекак, медицине организацийыш кайыде, медицине полышым мӧҥгӧ гыч йодман да санитарный врач-влакын кӱштымыштым тӱрыснек шуктыман.

Регионысо чыла работодатель пашаеҥ-влаклан капкыл температурым висаш йӧным ыштышаш, а кугу температуран-шамычым паша вер гыч кораҥдышаш. Роспотребнадзорын йодмыж почеш, у коронавирус инфекций дене черланыше еҥын паша жапысе чыла кылже шотышто тичмаш уверым пуышаш, черле лийме верыште дезинфекцийым эртараш йӧным ыштышаш. Йот эл гыч толшо, тыгак санитарный врачын изоляцийыш колтымо пашаеҥым паша верыш але организаций кумдыкыш пуртышаш огыл.  

Александр Евстифеев чыла организаций ден тӧнежлаште, тыгак социально кӱлешан объектлаште поснак дезинфекций режимым вияҥдаш кӱштен. Тылеч посна ответственный еҥ-влаклан кевытлаште кочкыш продуктым ситарыме сӱретым эскераш, умылтарыме да увертарыме пашам шукташ каласен.

17 мартлан республикыштына у коронавирус инфекций дене черланыме случайым регистрироватлыме огыл. Регионысо Минздравын данныйже почеш, 42 еҥ медицине велым эскералтеш, нуно чыланат таза улыт. Медицине организаций-шамычлан у коронавирус инфекцийым регистрироватлыман элла гыч толшо-влакым эскерыме шотышто ешартыш санитарно-противоэпидемический да профилактичекий мероприятий-влакым эртарыме шотышто предписанийым пуымо.

Роспотребнадзорын Марий Элысе виктемже поликлинике службо-влаклан палемдыме еҥ-влакын тазалыкышт шотышто отчётностьым кече еда ышташ кӱштен.

Тымарте у коронавирус инфекцийлан лабораторийыште 346 шымлымашым эртарыме да тиде шучко чер дене авалталтше еҥым рашемдыме огыл.

Республикыштына «инфекциян чер» профиль дене медицине полышым 8 станционарыште пуат. Инфекциян черле-шамычлан 246 койкым ойырымо, тышечын 101 койкыжым – кугыеҥ-влаклан, 145 койкыжым  – йоча-шамычлан.

Республикысе аптеке ден медицине организацийлаште кӱлешан эм ден маскын ассортиментышт шотышто мониторинг кече еда эртаралтеш.

Медицине пашаеҥ-влаклан клинике, диагностике, профилактике да моло йодыш дене 58 семинарым эртарыме. Тымарте тушто 7,5 тӱжем утла еҥым туныктымо. Тиде паша умбакыже шуйна.

Марий Эл Республикым  вуйлатышын организаций да

аналитике виктемжын уверже негызеш М.ИВАНОВА ямдылен

Опубликовать в Одноклассники

Добавить комментарий