КУЛЬТУР ДА ИСКУССТВО

Усталыкым вияҥдаш кумылаҥдыше вашлиймаш

23 гыч 25 июнь марте  М.Шкетан лӱмеш Марий кугыжаныш драме театр пелен пашам ыштыше усталык лабораторий финн-угор драматург-влаклан «Усталыкым вияҥде» лӱман семинарым эртарен. Тиде проект М.Кастрен обществын полшымыж дене шукталтын. Тушко Марий Эл, Мордовий, Удмуртий республикла гыч палыме драматург, режиссер возаш тӱҥалше автор, театрын артистше-влак чумыргеныт. 

Семинарым режиссер, драматург, Карелий Республик искусствын сулло деятельже Сергей Пронин (Сеппо Кантерво) вӱден.

Вашлиймаште икымше кечын Сергей Сергеевич драме произведенийым чын чоҥымо нерген каласкалыш. Пример шотеш тудын сар пагытым ушештарыше «Эхо» пьесыжым лончылышна. А кастеныже М.Шкетан лӱмеш марий драмтеатрын самырык артистше-влакын «Цилиндр» спектакльыштым ончышна.

Кокымшо да кумшо кечын автор-влакын произведенийыштым, эн ончычак марий драматургийыште шукертсек палыме, 12 книган авторжо Мария Илибаеван «Торешвате солаште — томаша» пьесыжым лончылышна.

Тиде произведенийым автор ӱмаште М.Шкетан лӱмеш марий драме театрын  «Эн сай пьесе» конкурсышкыжо ончаш луктын улмаш.

— Пьесын вуймутшак моткоч оҥай. Мария Каликаевнан икмыняр пьесыже театр сценыште ончыкталтын. Возымо тиде пашажат куштылго йылме дене ямдылыме, мыскара сынан да тачысе илышын тӱсшым почын ончыкта. Кызыт ме автор дене пашам ыштена, пьесым Йоча да самырык-влаклан театр-рӱдерын у тургымысо репертуарышкыжат пуртенна, — палемдыш театр-рӱдерын сылнымут ужашыжым вуйлатыше, драматург Геннадий Гордеев.

Тиддеч посна семинарын участникше-влак Екатерина Исайчеван (мордва артист, драматург) «Трава для кроликов», Светлана Вассанован (Курыкмарий район) «Вич казапача да пире», «Эх, пошкудем, пошкудем», Мария Москвинан (Йошкар-Ола) «Лось Ихтыго»  пашаже-влакым лончылымо. Палемдыман, Мариян сценарийже почеш ямдылыме музыкальный спектакльын премьерже 29 июньышто М.Шкетан лӱмеш марий драмтеатрыште лиеш.

— Курыкмарий драме театр дене иктаж кум ий кылым кучена. Ты гана мылам тачысе илышлан келшыше пьесым возаш йодыныт, — палдара С.Вассанова. — Семинарыште налме шинчымаш пашам умбакыже ышташ кумылаҥда. Адакшым Сергей Сергеевичат кӱлешан, ушан шомакше-влак дене полшыш.

Лончылымо паша годымак мемнан туныктышына сылнымутан произведенийлан лӱмым чын ойырен моштымо, вербатим (документальный произведений) нерген каласкалыш.

— Вуймут лудаш таратыше, йоҥгалтше лийшаш, — манын Сеппо Кантерво. — Мутлан, Островскийым налына. Тудо произведенийже-влакым калыкмут дене лӱмден. Тидат шкешотан ойыртем.

Вербатим йӧным кучылтын спектакльым ямдылаш кӱлмӧ шонымаш М.Шкетан лӱмеш драмтеатрын тӱҥ режиссержо Роман Алексеев ден Республикысе курчак театрын художественный вуйлатышыже Алексей Ямаевымат шонаш таратыш.

— Тиде моткоч сай йӧн. Калык деке лекташ шонымаш лийын, но ындыжым тиде сомылым ышташак кӱлеш, — палемдыш Роман Юрьевич.

Семинар жапыште участник-шамыч, поснак финн-угор родына-влак, «Марий» сийгудышто марий кочкыш денат палыме лийын кертыч. 

Финн-угор родына-влак дене вашлиймаш ик шӱлыш дене эртыш. Тудо икте-весе дене веле огыл, нунын пашашт дене палыме лияш йӧным ыштыш, а тӱҥалше автор-влаклан усталык пашаштым умбакыже шуяш кумылым нӧлтыш.

Алевтина Байкова.

Т.Светлакован фотожо. 

Опубликовать в Одноклассники

Добавить комментарий