«Культур» национальный проект полшымо дене Оршанке районысо тӱвыра пӧртыштӧ уэмден олмыктымо паша кая.
Тудын шукталтмыжым ончаш кодшо кечылаште республикын тӱвыра, савыктыш да калык паша шотышто министрже Константин Иванов миен коштын.
Тачысе кечылан подрядчик леведышым вашталтен, электровоштырым шупшын, омсам шынден, оралте йыр отмосткым ыштен. А кызыт тушто тӱжвал могыр гыч зданийым комыжлат, тувырашым ыштат. Пашам 31 процентлан шуктеныт.
— «Культур» нацпроектын «Тӱвыра алан» регионысо проектше полшымо дене ме оралтым арален кодышна. Олмыктымо паша мучашлалтмеке, тиде тӱвыра пӧртыштат илыш шолаш тӱҥалеш манын шонем, — палемден Константин Иванов.
Зданийым чоҥымеке, тудым иктаж 50 ий наре олмыктенат огытыл улмаш. Тӱвыра пӧртым уэмден пытарымеке, тушто тӱрлӧ кружок, ушем да молат шке пашаштым тӱҥалшаш улыт.
А.БАЙКОВА
