Кодшо арнян Шернур посёлкышто республик кӱкшытан «Гусельки» йоча усталык фестивальын икымше этапше эртен. Тушто Кужэҥер, Марий Турек, У Торъял, Параньга да Шернур районлаште илыше 222 йоча усталыкшым ончыктен.
Тазалыкыште экшык улман 5-17 ияш ӱдыр-рвезе-шамыч вокал, хореографий, декоративно-прикладной искусство, сылнымут шомак номинацийлаште вийыштым тергеныт.
Турын мучашлалтмекше, социальный вияҥмаш министр Ольга Фёдорован вуйлатымыж почеш, жюри иктешлымашым ыштен да фестивальын участникше-шамычлан диплом ден шарнымашан пӧлек-влакым кучыктен.
Икымше этапын эн сай коллективше ден солистше-шамыч 1 декабрьыште Йошкар-Олаште Сеҥымашын 30-шо идалыкше лӱмеш тӱвыра полатыште эртаралтше гала-концертыште усталыкыштым тергат.
М.ИВАНОВА.
Фотом Марий Эл Республикын Социальный вияҥмаш министерствыжын сайтше гыч налме.