ТАЧЕ ЯЛЫШТЕ ЯЛОЗАНЛЫК

Ужалышыжат, налшыжат шагалын лийыныт

Йошкар-Олаште Мӱй спас кузерак эртыш?

Кодшо ийлаште тиде кечын мӱкшызӧ-влак Чарла кремльыш погыненыт да чынжымак, Мӱй спасым пайрем семын эртареныт. Саламлымаш деч поснат эртен огыл, эсогыл художественный самодеятельность коллектив-влак чапле концерт дене куандареныт. Ынде сӱрет вашталтын. Ик могырым, коронавирус эпидемий шарлен кертме лӱдыкшӧ улмым шотыш налме, вес могырым, РФ правительствын 2021 ий 30 январьысе пунчалжым (тушто ялозанлык сатум вигак калыклан ужалышашлан стационарный огыл ужалыме объект-влакым шукемдыме нерген ойлалтеш) шотыш налын, мӱйым да мӱкшын пуымо моло продукцийым верлашке лектын ужалаш палемдыме ыле. Тиде гана мӱкшызӧ-влаклан 14 да 15 августлаште Йошкар-Олаште шке сатуштым ужалаш верым ондак вич вере палемдыме ыле гын, варажым ныл вере гына темленыт: рӱдӧ пазарысе Торговльо пӧрт ончылсо кумдыкышто, Сомбатхей микрорайонысо «Ёлка» кевыт ончылно, Сеҥымашын ХХХ идалыкше лӱмеш тӱвыра полат ончылно, Рӱдӧ тӱвыра да каныме паркыш пурымаште.

Ме Оршанке район Чирки ял гыч мӱкшызӧ В.Григорьев дене мутланышна. Тудо шке сатужым Рӱдӧ пазарысе Торговльо пӧрт ончылно ужален. Виталий Алексеевич тыге мане:

– Рӱдӧ пазарыш шуко калык коштеш, сандене, кеч ужалышыже визытын веле лийынна, мӱйым да мӱкшын пуымо моло продукцийым налше-влак шагалын огыл лийыныт. Икымше кечынже поснак шукын улыт ыле. Утларакше  карашан мӱйым, пергам, прополисым кумылын налыныт. Акыштым ончалаш гын, тудо нимынярат кӱзен огыл. Кеч кызыт чыла тӱрлӧ сату ятырлан шергештын. Ончыч мӱйлан шнуй шӱлышым ярмиҥгаште черке пашаеҥ-влак пуртеныт гын, тений лачак храмыште веле тидлан йӧн лийын.

В.Южаков, Йошкар-Олаште ила, мӱкшыжым Оршанке район Марково кундемыште ашна. Тудо сатужым Сомбатхей микрорайонысо «Ёлка» кевыт ончылно ужален: 

– Мӱй спас кушто лийшашым калык сайынже паленат огыл манын шонем. Адакшым мӱйын да мӱкшын пуымо продукцийын айдемын тазалыкшылан пайдале улмыштым утларак кумдан калык коклашке шараш, умылтарыме пашам эртараш уто огыл. Тиде гана сатум ужалыме шотышто моктаненжак ом керт.

Ужалыше-влакын чотышт ты гана колышкат погынен огыл. Коеш, мӱкшым ашныше-влаклан шке сатуштым ужалаш утларак да утларак неле лиеш. Моланже, ынде мӱкшызӧ-влак палынак ешаралтыныт, ужалышыжат тидлан кӧра шукемыныт. Вет мӱйым ятыр кевытла воктене кече еда ужалат, кевытыштыжат тиде сату ятырак. Адакшым мемнан кундемые калыкнан окса чондайже кӱжгӱжак манын каласаш ок лий. Сандене мӱкшызӧ-влак отарыштым иземдаш кӱлмӧ нергенат мутым луктыт. Вет шукыштын эше ӱмашсе мӱйыштат шагал огыл ужалалтде кодын.

В.Смоленцев            

 

 

 

Опубликовать в Одноклассники

Добавить комментарий