2019 ийым Тӱп калык-влакын тӱнямбал идалыкышт семын увертарыме. 24-25 майыште Санкт-Петербургышто, А.И.Герцен лӱмеш кугыжаныш педагогический университетыште, эртыше «Российын социокультурный кумдыкыштыжо межэтнический да йылме-шамыч кокласе кыл: эртыше да кызытсе» симпозиум лач тидлан пӧлеклалтын.
Шочмо йылмым, сылнымутым, тӱвырам туныктышо-влакым ямдылымаште могай нелылык вашлиялтеш, туныктымо пашам кузе семдаш, йылмым арален кодаш мом ыштыман, Российыште илыше калык-влакын историйышт, тӱвырашт да кызытсе илышышт могай? Погынышо-влак лач тидын нерген ойленыт, каҥашеныт.
Марий кугыжаныш университетын профессоржо Л.Абукаева докладым (тудым А.Чемышев дене пырля ямдыленыт) ыштен да секцийын пашажым вӱден. Россий да вес элла (Венгрий, Украин, Финляндий, Франций, США) гыч мийыше шанчыеҥ да туныктышо, журналист да мер пашаеҥ-шамыч марий йылме корпус да таҥастарымаш мутер нерген каласкалымым колыштмеке, тыге палемденыт: паша сай, пайдале, тыгодымак неле. Санденак колыштшо-влак шуко йодышым рашемденыт.
Л.Абукаеван палемдымыж почеш, «Моло йылмын корпусышт лийшаш да тидлан посна фондым але программым Россий кӱкшытыштӧ ышташ кӱлеш» каҥашыжым симпозиумын резолюцийышкыже пуртеныт.
Снимкыште: профессор Л.Абукаева да Йӱдвел калык-влакын институтыштын директоржо, профессор И.Набок.
Г.КОЖЕВНИКОВА
